Vandaal kos ondernemings R30 000
‘n Man wat skynbaar sonder enige rede ‘n aantal winkelvensters in kerkstraat stukkend geslaan het is Woensdagaand in Kerkstraat in hegtenis geneem. Die man het ‘n halwe baksteen gebruik en ongeveer R30 000 se skade aangerig voordat hy aangekeer is.
Sers. Gretchen Micheals, woordvoerder van die Oudtshoorn-polisie, het gesê die 36-jarige man is op aanklag van opsetlike saakbeskadiging in hegtenis geneem.Hy sou vandag in die Oudtshoorn-landdroshof verskyn. Die winkels wat skade gely het is Russels, M.M. Furnitures, Spec-Savers en Slabber en Slabbert-oogkundiges. Daar is egter nie by een van die winkels ingebreek nie. Volgens ‘n personeellid van een van die ondernemings het hulle alarm-maatskappy hulle gebel en gesê daar is venster by hulle gebreek. Die halwe baksteen is by M.M. Furnitures gevind.
“Die sekerheidswag wat oorkant ons winkels in Kerkstraat werk het die man gesien en ook gesien hoe hy die vensters met die baksteen breek. Sy het die polisie gebel en hulle was regtig vinnig op die toneel en kon die mannetjie net betyds vang voor hy die pad kon vat,” het die vrou gesê.