Tweede Blerrie Vêr Kersfees in Toekomsrus
Die inwoners van Panoramastraat en Romeosingel in Toekomsrus bied op 24 Desember die tweede Blerrie Vêr OuKersfees-fees aan.
Volgens Percy de Villiers, een van die inwoners wat die dag aanbied, het hulle verlede jaar die eerste keer die geleentheid aangebied.
“Ons wil dit ‘n jaarlikse ding maak omdat mense het heeltemal vergeet waaroor Kerstyd werklik gaan. Die hele Kersgees is weg uit ons gemeenskap. Ons het verskeie aktiwiteite wat ons gaan aanbied onder andere gesigverf vir die kinders en domino’s vir die grootmense. Daar gaan ook ‘n Mej. Blerrie Vêr 2018 gekies word.”
Volgens hom gaan die feeskomitee vir vure en kole sorg sodat die inwoners wat die geleentheid gaan bywoon hul eie vleis kan braai. Kinders kan ook weer uitsien na iets kleins en daar sal vir die volwassenes ook ‘n verrassing wees.
“Ons gaan plaaslike kunstenaars hê wat die mense gaan vermaak. Oudtshoorn se eie kulkunstenaar, Jannie de Bruin gaan optree, sowel as ÔL-STAR Live Band, Danny B Manuel, Luigi April, Vinzelle Damons, Kesia Swart, Lizell van Hansen en Janion Kennedy.”
Enigiemand wat navrae oor die geleentheid het kan Duwayne by 074 045 6942 of Percy by 063 548 8364 skakel.