Ontevrede inwoners neem deel aan betoging
’n Groep ontevrede inwoners van Oudtshoorn het vroeg Woensdagoggend by die sirkel naby Bridgton UCC bymekaar gekom om aan ‘n georganiseerde betoging na die Oudtshoorn-munisipaliteit deel te neem. Volgens Joey Hefke, sameroeper van die groep, ‘Opi Jaart Mense’ is hulle ontevrede oor die haglike omstandighede waarin hulle woon omdat die plaaslike munisipaliteit afgewyk het van die kriteria wat veronderstel was om huise aan inwoners toe te ken.
“Baie van ons mense is al donkie jare op die behuisingswaglys, net om te sien dat daar aan ongetroude mense, vreemdelinge sonder burgerregte en persone wat nie op die waglys is nie, huise toegeken word.”
Hefke het gesê dat die groep ‘n datum vir ‘n amptelike vergadering van die munisipale bestuurder en burgemeester versoek het sodat daar ‘n oplossing gevind kan word vir die gruwelike miskennings van hul omstandighede.
Volgens Allan Paulse, munisipale bestuurder, verwelkom die munisipale kantore enige kritiek teen die plaaslike munisipaliteit.
Hy het by die oorhandiging van die griefskrif aan die groep betogers gesê dat hy trots is op die vreedsame manier waarop hulle hul griewe en ontevredenheid lig.
“As daar enige swakhede in ons mondering bestaan, kan ek u die versekering gee dat dit daadwerklik aangespreek sal word.”
Paulse het beloof om in oorleg met die burgemeester op ‘n datum te besluit wanneer dié twee partye amptelik om die tafel sal vergader.