Calitzdorpers moedeloos oor misdaad
Inwoners van Calitzdorp sit met die hande in die hare oor die voorkoms van misdaad. Terwyl dit veral nuwe intrekkers is wat deur die misdaad ontnugter is, is dit duidelik dat die hele gemeenskap sowel as boere bekommerd is oor die wetteloosheid. Vroue wat alleen woon en wie se huise geteiken word, voel ook toenemend onveilig.
“Ten spyte van munisipale verordenings, neem dronkenskap, urinering en rommelstrooiing op straat, diefstal van vrugte in die seisoen en goed beplande inbrake, aanranding en dwelmhandel toe,” sê Deon Kriek, voorsitter van die Calitzdorp Aksiegroep en visevoorsitter van die Calitzdorp-toerismekomitee, wat die dorp van verval wil red.
“‘n Week gelede is twee kinders van onderskeidelik 10 en 12 jaar oud, helder oordag in ‘n vrou se plaashuis betrap. Die inhoud is beskadig, die mure is met spuitverf ontsier en daar is op die matte ontlas,” se Kriek.
“Die buurtwag het die kinders in die huis aangetref. Hulle is na hul ma se huis op die plaas geneem, waar sy onder die invloed van dwelmmiddels aangetref het.”
In die jongste voorval was daar Donderdagaand 10 Januarie twee pogings om by nog ‘n vrou se huis in te breek en die afgelope weke is vier skootrekenaars uit huise en voertuie gesteel.
Die inwoners vermoed die inbrake hou verband met dwelmverslawing wat deur bendes uitgebuit word en dat hulle jong kinders aanhits om in te breek met die belofte van vergoeding.
“Die nuwe intrekkers lewer ‘n belangrike bydrae tot die dorp se ekonomie deur die toeriste-infrastruktuur wat hulle skep. Weens die droogte is daar nie seisoenwerk in die vrugtebedryf nie en toerisme is die enigste volhoubare manier om die dorp aan die gang te hou.”
‘n Nuwe intrekker wat anoniem wil bly sê: “Ons het hierheen gekom om ‘n gastehuis te vestig, en ons voel steeds dat ons hier ‘n toekoms het. Maar iets moet dringend aan die misdaad gedoen word, want ons wil hê Calitzdorp moet ‘n gewilde en veilige toerismebestemming wees.”
Drie nuwe buurtwagte patrolleer saam met die bestaande buurtwag die verskillende gebiede van die dorp omdat die polisie te min personeel het om die uitgebreide gebied te bedien.
“Ons doen ‘n beroep op die politici, die polisie en die regstelsel, asook die verskillende departmente om toe te tree tot die stryd teen misdaad,” sê Kriek.
Navrae oor die misdaadsituasie in Calitzdorp is Maandag aan die polisie se woordvoerder in die Suid-Kaap gerig, maar geen terugvoer is teen gister ontvang nie.
Kontak Deon Kriek by 082 466 0486 vir meer inligting oor die Aksiegroep en buurtwagte.
“Ons doen ‘n beroep op die politici, die polisie en die regstelsel, asook die verskillende departmente om toe te tree tot die stryd teen misdaad,”sê Kriek.