Borgtog geweier aan man wat glo vermoor

Borgtog is Woensdag in die Oudtshoornstreekhof aan ‘n man van De Rust, wat van moord en verkragting van die 18-jarige Ronel Martins aangekla word, geweier.

Die staat beweer dat die verdagte, Flip le Grange (29) vir Martins, van die plaas Rietfontein in die De Rust-distrik, verkrag en daarna vermoor het.

Martins het op Vrydag 7 Desember 2018 op Middelplaas by familie gaan kuier, maar nooit weer by die huis opgedaag nie.

Haar liggaam is op Sondag 9 Desember in ‘n ou onbewoonde plaashuis gevind. Le Grange is die volgende dag in hegtenis geneem.

Hy het verlede week in sy borgaansoek erken dat hy Martins doodgemaak het omdat sy gedreig het om ‘n saak van verkragting teen hom aanhangig te maak.

Landdros Roelf Konstabel het in sy uitspraak gesê Le Grange staan tereg op ‘n Bylae 6-misdryf waarvoor die voorgeskrewe vonnis lewenslange gevangenisstraf is, en hy moontlik met die vonnis in gedagte kan vlug.

Die hof het wel bevind dat hoewel geen basis gelê is dat hy met staatsgetuies sal inmeng, hulle te intimideer of regspleging in gevaar bring nie, daar ‘n mate van bekommernis is ten opsigte van vorige skuldigbevindings op klagtes van ‘n seksuele misdryf en aanranding.

“Dit wil voorkom asof die beskuldigde nie andere se liggame respekteer nie.”

Volgens die landdros het Le Grange in ‘n bekentenis aan die polisie erken dat hy Martins verkrag en vermoor het, maar met sy borgtogaansoek aangedui dat hy slegs op die aanklag van moord skuldig gaan pleit.

Volgens die landdros sal dit skokgolwe deur die gemeenskap van Middelplaas en De Rust stuur indien borgtog toegestaan word.

“Dit sal vertroue in die howe ‘n knou gee en regspleging in onguns bring,” het die landdros bygevoeg.

Die saak is vir verdere ondersoek tot 1 Maart uitgestel.