Winterfees betrek meer plekke
Alhoewel die Calitzdorp Winterfees die afgelope naweek stiller was as die vorige jaar, is die organiseerders ingenome met die nuwe formaat waarin die fees aangebied is.
Een van die organiseerders, Annarie Cornelius, het na afloop van die fees gesê: “Die fees was in ’n nuwe formaat hierdie jaar om dit meer gebruikersvriendelik te probeer maak. Ons wou mense elke kelder se unieke atmosfeer laat ervaar daarom was dit meer verspreid. Dit was wel baie stiller as gevolg van die land se ekonomiese omstandighede en die droogte wat die Suid-Kaap nog kniehalter, maar ons is baie tevrede met die ondersteuning.”
Sy beskou die fees as ‘n sukses en sê die organiseerders is bewus van heelwat kwessies wat nog kan verbeter. Verskeie wynkelders is Saterdag uitstekend ondersteun met besoekers wat tougestaan het om die dorp se uitsoekwyne te proe. Die Garden Routedistriksmunisipaliteit het ook vanjaar ‘n finansiële bydrae tot die fees gemaak. Een van die keldereienaars op die dorp het Saterdag gesê dat elke stukkie inisiatief wat aan die dag gelê word, meehelp om die dorp se ekonomie in die greep van die droogte te help.
Hy noem byvoorbeeld dat daar onder normale omstandighede bykans 450 tydelike werksgeleenthede in die winter was wanneer nuwe wingerde aangeplant word. “Met die droogte word daar egter niks aangeplant nie, en daardie mense sit sonder enige inkomste.”
Volgens die organiseerders is die Winterfees ‘n geleentheid wat op die dorp se jaarlikse kalender sal bly.