Droogtehulp-vervoer benodig
Die South African Water Warriors is op soek na ‘n sentrale stoorplek in George vir skenkings wat van gebiede elders in die land af inkom vir boere in die Oudtshoornomgewing.
Vervoer van die skenkings van George na Oudtshoorn word ook benodig.
Boere in die Oudtshoorn-omgewing gaan nou vir die vyfde jaar onder droogte gebuk. Volgens Pieter du Plessis van Water Warriors, het hulle persone in Thabazimbi, die Oos-Kaap, Vaaldriehoek, Gauteng en die Wes-Kaap wat troeteldierkos, kruideniersware en water insamel vir die boere.
“Vyf koeriers vervoer die goedere gratis tot in George, vanwaar ons dit op 20 Julie in ‘n konvooi oor die berg wil neem. Ons reik uit na ongeveer 150 gesinne, wat plaaswerkers insluit.”
Water Warriors benodig ook vervoer vir voerskenkings uit die omgewing van Aliwal-Noord, waar ongeveer 70 bale voer beskikbaar is, asook Koppies waar nog 70 bale asook 35 ton mielies wag om vervoer te word. “Die vervoer hiervan gaan verkieslik direk na Oudtshoorn. Ons het nou die dag 30 ton makataan deurgestuur na Oudtshoorn waar die boere dit reeds vir hul diere gegee het.”
Van volgende week af begin die organisasie met nog ‘n insamelingsveldtog by supermarkte waar mense skenkings in trollies sal kan plaas.
Du Plessis sê tussen 15 00 tot 1 800 boere in die Noord-Kaap benodig ook droogtehulp. “Ons volgende uitreik sal seker in daardie rigting gaan, maar vir nou konsentreer ons op Oudtshoorn.”
Mense wat kan help met vervoer van kruideniers- en waterskenkings van George na Oudtshoorn of met vervoer van bale en mielies, kan Du Plessis skakel by 076 844 6435. Die borg van brandstofkoste is ook welkom.
“In die laaste vier jaar is daar na raming R1 miljard se verliese gely omdat daar geen lusernproduksie in die Klein-Karoo was nie,” sê Du Plessis. In die volstruisbedryf word die verliese oor die afgelope drie jaar op R1,3 miljard gereken.
“Daar is ook verliese aan arbeid. Tans is daar sowat 180 mans onder die boere asook op die dorp wat oorsee werk om ‘n inkomste te genereer vir hul gesinne.
Die werkloosheid word gereken op 80% direk en indirek weens boere se produksieverliese.”