Kunstenaars gooi ateljeedeure oop
Kunstenaars in en om Prins Albert gooi volgende maand hulle deure vir die publiek oop met die Open Studio’s-tuisuitstalling. Altesame 25 kunstenaars, wat in ongeveer 20 verskillende mediums werk, neem deel aan die uitstalling vanaf 5 tot 8 Julie.
Dit is die vierde Open Studios wat hier aangebied word – ’n sesmaandelikse uitstalling waarvan die eerste een in Desember 2017 was. Dit is die idee van die plaaslike houtdrukkunstenaar Joshua Miles, en word deur Collette Hurt, nog ’n Prins Albertse kunstenaar, bestuur.
Die mediums sluit onder meer in olieverf, waterverf, etse, linodrukwerk, beeldhouwerk, metaalwerk, gemengde media, weefwerk, illustrasies, drukwerk, keramiek, juweliersware, fotografie, kalligrafie, glaskuns, skeppende letterwerk, funksionele kunswerke, poppemakery en landskapskuns.
Behalwe die vaste uitstalling van ’n verskeidenheid kunswerke in die Prince Albert Gallery in die hoofstraat kan besoekers die kunstenaars oor dié naweek in hul ateljees besoek om te kyk hoe hulle werk. Hulle kan hier van die kunswerke aanskaf. ’n Spesiale roetekaart is by die kunsgalery beskikbaar.
Die naweek word voorafgegaan deur twee werksessies: Op Woensdag 3 Julie bied die letterkunstenaar Heleen de Haas ‘Writing with nature’s tools’ op die plaas Aswater (tussen Prins Albert en De Rust) aan, en op Donderdag 4 Julie bied die beeldende kunstenaar Di Johnson-Ackerman ’n linosnee-werksessie aan.
Miles het Open Studios begin nadat hy en medekunstenaars op sy vorige woonplek, Baardskeerdersbos, ’n kunstefees op dieselfde beginsel begin het. Die afgelope drie Open Studios-uitstallings in Prins Albert het vinnig gegroei, met honderde toeriste wat dan op die dorp toesak en die kunstenaars in hul ateljees besoek.
Terwyl die meeste van die uitstallers kuns as voltydse loopbaan bedryf, sê Miles Open Studios is nie net gereserveer vir professionele kunstenaars nie.
Christelle Smit, ’n onderwyseres by die Hoërskool Zwartberg, bestempel haarself as ’n deeltydse en nie-professionele kunstenaar. Dit is haar derde Open Studios-deelname.
“Dit bied vir my blootstelling as onbekende kunstenaar. Dit gee my ook die geleentheid om my talent te ontwikkel en ’n rede om my talent te ontwikkel. Ek wil graag, nadat ek afgetree het, ’n gevestigde kunstenaar wees. Dit beteken dat ek nou moet eksperimenteer om ’n styl en gunstelingmedium te vind, want tans doen ek nog wat in my gedagtes kom en toets verskillende media uit. Ek het egter begin beweeg in die rigting van oliepastelle en vind dit verrykend.”
• Van die ander deelnemende kunstenaars is: Cobus van Bosch, Kevin de Klerk, Sally Arnold, JP Meyer, John O’Sullivan, Janet Dirksen, Joanna Orr, Di Van der Riet-Steyn, Jurgen Schadeberg, Sheila Coutouvidis, Kashief Booley, Renée Calitz, Hélène Smit, Pat Hyland, ‘Brita Dolls’, Sue Hoppe en Lara Evans.
Vir meer inligting oor Open Studios: collettehurt@gmail.com of karoogallery@ intekom.co.za of skakel 023 5411 057.