Jeugdag in kerk en op sportterrein gevier
Twee organisasies het Jeugdag die afgelope naweek op Oudtshoorn met ‘n kerkdiens en sportdag gevier.
Die Oudtshoorn Christelike Jeugforum (OCJF) het Sondag ‘n kerkdiens in die Toekomsrus-gemeenskapsaal gehou terwyl die Gemeenskap Intergenerasie Sport, Kultuur en Opvoedkundige Programme (GISKOP), ‘n nie-winsgewende gemeenskapsorganisasie, Maandag ‘n sportdag op die Bridgton-sportterrein gereël het.
Tydens Sondag se kerkdiens het die Eden-polisiehoof, genl.maj. Oswald Reddy, die burgemeester van Oudtshoorn, Colan Sylvester en streekhofaanklaer, adv. Michelle Weyers as sprekers opgetree terwyl die boodskap deur pastoor Rhyno Davidson van Uniondale gebring is.
Reddy het in sy toespraak die OCJF geloof vir die werk wat die organisasie onder die jeug van Oudtshoorn doen.
Hy het met verwysing na twee jongmense wat die vorige aand op George vermoor is, gevra in watter soort gemeenskap word ‘n lewe so goedkoop gemaak.
Volgens hom is dit grotendeels drank en dwelms wat lei tot die huidige vlae van geweld.
Sy boodskap aan volwassenes was om alkohol verantwoordelik te gebruik en vir die jeug dat hulle nie sonder drome moet leef nie.
Tydens Maandag se sportdag van GISKOP het kinders aan raakrugby, sokker, netbal, boeresport en dominos deelgeneem. Hoewel dit die jeug se dag was het twaalf spanne met grotendeels volwassenes aan die dominokompetisie deelgeneem en groot belangstelling gelok.
Volgens Mark Jackson, voorsitter van Giskop, is die dag moontlik gemaak met die ondersteuning van die Oudtshoornmunisipaliteit se jeugkantoor, Meals on Wheels, die departement sport en kultuur, maatskaplike ontwikkeling, Sasko Sam, die Oudtshoorn-polisiediens, die Oudtshoorngroentemark en die Bridgton-rugbyklub.
Die dag het begin met ‘n optog vanaf die Bongolethu-sirkel wat gelei is deur ‘n blaasorkes waaraan ‘n groep senior burgers ook deelgeneem het.