Boerevereniging skenk verwarmers
“Dit is die eerste keer dat boere vir ons iets doen en dit is vir ons ‘n riem onder die hart dat ons ondersteun word deur hierdie groep wat help om die dorp se ekonomie aan die gang te hou.”
Aan die woord is
Hettie Coleman, hoof van
Gottlandhuis, wat
12 muurverwarmers, geskenk deur die Kangovalleielandbouvereniging, in ontvangs geneem het.
Gottlandhuis is deel van Oudtshoorn se ACVV. In hierdie 114-jaar-oue huis word kamerversorging verskaf aan die 31 inwoners. “Daar is geen verandering aangebring aan die oorspronklike truktuur nie. Die perseel bestaan uit vier blokke, waarvan die oorspronklike perdestalle omskep is in enkelkamers, wat die inwoners self meubileer. Ons het nie ‘n siekeboeg nie. Wanneer bejaardes hier verswak word hulle verskuif na Bellinghanhof,” vertel sy.
Die inwoners het verskeie gemeenskapsprojekte soos byvoorbeeld broodjies wat elke Donderdag aan die hospitaal se kindersaal voorsien word en komberse hekel en brei vir mense met gestremdhede.
Volgens Chris Botha, ondervoorsitter van die landbouvereniging, is die verwarmers aangekoop uit ‘n gedeelte van die wins wat die vereniging gemaak het uit die Kango Agri Expo van 2018. Vanjaar se fonsdinsamelingspoging wat weer gedeeltelik vir gemeenskapsprojekte aangewend word, is ‘n pret-gholfdag wat op 5 Oktober aangebied word. Vir navrae oor deelname aan die gholfdag, kontak Kobus Theron by 079 619 0124.