Geen keer aan All Blacks
All Blacks-rugbyklub se A-span het Saterdag sy sewende agtereenvolgende oorwinning in die SWD Presidentsliga behaal toe hy Uniondale United op die Oudtshoorn-sportterrein met 31-28 geklop het. Alhoewel die All Blacks nie gevaar geloop het om te verloor nie, is die eindtelling ‘n pluimpie vir Uniondale se vasberadenheid.
Die swart truie het die enigste punte in die eerste helfte aangeteken toe Anrich Daniëls (vleuel) twee onverdoelde drieë gedruk het om sy span teen rustyd met 10-0 te laat voorloop.
Daniëls wat voorheen ‘n All Blacks-speler was, het die afgelope drie jaar vir Bridgtonrugbyklub gespeel. Hy het egter vanjaar besluit om na sy spreekwoordelike huis te keer.
Hierdie vlugvoetig vleuel het nie teleurgestel nie, en het sy eerste wedstryd behoorlik in styl gevier toe hy ‘n driekuns van drieë behaal het. In die tweede helfte het die spel losgetorring met albei spanne se verdediging wat veel te wense oorgelaat het. Vir die tuisspan was Nathan Baartman (senter) deurgaans aan die voorpunt van sy span se teenaanvalle met sy dodelike systappe.
All Blacks het in hierdie periode vyf drieë teenoor Uniondale se vier drieë gedruk. Vinchenzio Adams, skrumskakel van All Blacks, kon daarin slaag om drie doelskoppe deur die pale te jaag. Mortimer Filander (haker), Nathan Baartman (senter), Colin Winster (agsteman), Marvin Wilkens (heelagter) en Anrich Daniëls (drie drieë) het almal agter die pale gaan kuier.
Met hierdie oorwinning beklee All Blacks tans die derde posisie op die algehele SWD Presidentsliga punteleer. All Blacks se volgende wedstryd is Saterdag teen Spring Roses by die Bridgton-sportterrein. Spring Roses het tot dusver vanjaar nog net een ligawedstryd verloor. In nog ‘n SWD Presidentsligawedstryd het Collegians Saterdag op die Bridgton-sportterrein die sukkelende Adias van Volmoed met 38-3 geklop.