Sewe jaar vir huisbraak
'n Man van Prins Albert wat aan huisbraak met die opset om te steel en diefstal skuldig bevind is, is verlede week in die Oudtshoorn-streekhof sewe jaar gevangenisstraf opgelê.
Arrie Christiaans (38) het op 4 September 2018 by die huis van Allen Green ingebreek en beddegoed, ’n bedlampie en kruideniersware ter waarde van sowat 'n R1 000 gesteel. Hy het skuldig gepleit.
Die staatsaanklaer, Willem Vister, het vir direkte gevangenisstraf gevra omdat vorige vonnisse wat Christiaans opgelê is, nie die gewenste uitwerking op hom gehad het nie. "Die belang van die gemeenskap speel ’n groot rol en daarom sal ’n opgeskorte vonnis soos deur die verdediging versoek nie ‘n gepaste vonnis wees nie." Wenzel Botha van die Regshulpraad het die hof versoek om Christiaans se tien maande in aanhouding en die feit dat hy skuldig gepleit het vir vonnis in ag te neem. Streeklanddros Ntsoki Moni het met vonnisoplegging gesê die saak is van die distrikshof na die streekhof oorgeplaas omdat vonnisse wat hy in die laerhof opgelê is hom nie gerehabiliteer het nie.
Hy is nie ’n eerste oortreder nie en moet uit die gemeenskap geneem word om hulle teen mense soos hy te beskerm.
Volgens die landdros moet ’n vonnis ook opgelê word wat andere sal weerhou om dié soort misdaad te pleeg wat algemeen in die hof se bedieningsgebied voorkom.
Sy het Christiaans tot sewe jaar gevangenisstraf gevonnis en ook onbevoeg verklaar om 'n vuurwapen te besit.
Hy moet ook enige vuurwapen en ammunisie in sy besit aan die staat oorhandig.