Bekroonde musici by Klassique
Die elfde Klein Karoo Klassique-program word gekenmerk deur bekroonde uitvoerings en kunstenaars wat by dié fees van klassieke musiek, kuns, kos en wyn te sien is. Klassique word van Donderdag 8 tot Sondag 11 Augustus op Oudtshoorn aangebied.
“Ons sien uit om die winterkoue op Oudtshoorn met uitmuntende klassieke musiek te verdryf,” sê Hugo Theart, artistieke direkteur van Klein Karoo Klassique.
Hy verduidelik dat die program vir die eerste keer sedert 2015 ’n Klein Karoo Klassique Galakonsert insluit. “Dié galakonsert is een van nege uitvoerings wat, danksy die volgehoue ondersteuning van die Rupert-musiekstigting, aangebied word. Die samestelling van ons gewilde Klassiquepakket maak dit vir feesgangers moontlik om elke noot te hoor en boonop meer as 20% te spaar,” vertel hy.
“Die program is sorgvuldig saamgestel om ’n verskeidenheid instrumente en werke in te sluit, met iets vir ieder en elk se smaak,” sê hy. Behalwe vir die galakonsert by die burgersentrum, word die meeste van uitvoerings en aktiwiteite weer by die NG Moederkerk aangebied.
Klassique begin op 8 Augustus om 18:30 met La Femme! – A Celebration of Music and Dance met Tanya Diamond (dans & choreografie), Nina Fourie-Gouws (kitaar) en lede die SoloFLAMENCO dansstudio wat tradisionele Spaanse begeleiding bied.
Ander musici op die vol program is Liesl Stoltz (fluit), David Pinoit (tjello) en François du Toit (klavier) en die bekende plaaslike pianis Sulayman Human, wat op 9 Augustus weer in sy tuisdorp is met When Poets Speak.
SAMRO Oorsese-beurswenner Dylan Tabisher, besin in Marimba Melodies (9 Augustus 18:00) oor sy reis as marimbaspeler.
Nog ‘n hoogtepunt is Violin Dialogue (10 Augustus 10:30) met Zanta Hofmeyr (viool), Miro Chakaryan (viool) en Olive Sandilands (klavier) wat in 2018 met die Fiësta vir beste prestasie in klassieke musiek én beste klassieke musiekproduksie by Aardklop bekroon is.
Die Klein Karoo Klassique Galakonsert (10 Augustus 19:00) word ter viering van Vrouedag aangebied, met duo’s en trio’s uit operettes, musiekblyspele en opera – vertolk deur Kaapse-sopraan Minette du Toit-Pearce, TV-persoonlikheid en Kunste Onbeperk Jong Stem-vereerde, Lynelle Kenned en Janel Speelman. Die jong pianis, Qden Blauw lei die program in.
Kaapstad se Amici Strykkwartet, een van Suid-Afrika se voorste kamermusiekensembles, neem op 11 Augustus om 11:00 gehore op reis deur werke van die voorste strykkwartet-komponiste in die geskiedenis, in Sublime String Quartets from Bohemia.
Klassique 2019 eindig met ATKVvirtuose in konsert (11 Augustus 14:30) met Bongani Kubheka (bariton), Cameron Williams (saksofoon) en Megan-Geoffrey Prins (klavier). Williams en Kubheka is onderskeidelik die wenner van ATKV-Muziq 2018 en ATKV-Muziqanto 2018.
Theart noem verder dat feesgangers kan uitsien na bykomende konserte, kunsuitstallings, proe-ervarings en smulkos by die plaaslike restaurante. “Hou gerus die webblad dop vir die jongste nuus en bespreek verblyf vroegtydig”, sluit hy af.
Die volledige feesprogram is eersdaags beskikbaar by www.klassique.co.za en kaartjies kan binnekort by enige Computicket, Shoprite/Checkers, House & Home, of aanlyn by www.computicket.com gekoop word.
Vir meer inligting, kontak Kunste Onbeperk se kantoor by 044 203 8600, of info@kunste.org.za.