Eilers was meer as ‘n akteur
Al was hy vir dekades volksbesit, was Paul Eilers (74) 'n uiters private mens wat glad nie van groot geleenthede en gedoentes gehou het nie en begrafnisse het hom nie aangestaan nie. Daarom, sê sy vrou Marina, gaan daar nie 'n diens wees nie en gaan die gesin en naaste familie van hom afskeid neem.
"Die afgelope 48 uur was die swaarste in ons lewens. Paul was die anker van Huis Eilers, ons liefling en beste maat," het sy Maandagoggend gesê. Hulle was 26 jaar getroud en woon sedert 1995 in Oudtshoorn. Hulle seun, Paul (25), is 'n student aan Rhodes Universiteit op Grahamstad waar hy sy LLM-graad doen. Eilers het Vrydagaand omstreeks 19:00 in sy gunsteling stoel gesit toe hy inmekaargesak het. Volgens Eilers se geneesheer was die oorsaak van sy dood waarskynlik 'n pulmonale embolus. Hy het in 2006 'n hartomleiding ondergaan en het ook kanker gehad wat in remissie was.
Leon van Nierop en Margot Luyt was van die eerste eertydse kollegas van Eilers, wat op sosiale media hulle skok uitgespreek het en hulde aan die veelsydige man gebring het, Sedertdien het dosyne bekendes op sy dood gereageer en staaltjies oor Eilers vertel wat hulle onthou van tye wat hulle paaie gekuis het. Onder hulle is Regardt van den Bergh, Marius Weyers, Laurika Rauch en Sallas de Jager.
Alhoewel Eilers waarskynlik die beste onthou word vir sy rolle in Vyfster, die ongeskikte nuusredakteur in Sonkring en meer onlangs as At in Dominee Tienie, het hy honderde ure agter die radiomikrofoon deurgebring en ook agter die kameras as regisseur in films soos Roepman en Verraaiers.
Behalwe vir hierdie uiteenlopende rolle in die vermaaklikheid s bedryf was Paul Eilers ook 'n bedrewe poppemeester. Vir Marina was een van die wonderlikste aspekte van hulle lewe om die afgelope aantal jare saamsaam poppeteater oor die Suid-Kaap heen aan te bied om kinders bewaringsbewus te maak.
"Vir my was dit 'n groot voorreg om by hom as gesoute poppemeester te kon leer. Ons het baie saam gelag en ek glo hy het ook so talle jong kinders se lewens verryk."
Op Oudtshoorn het Eilers gereeld ingestem om aan plaaslike aanbiedinge deel te neem. Byboek bekendstellings, kultuur aande en voorlesings het hy gereeld sy deel gedoen, kwinkslae kwytgeraak en boekwoorde met sy bekende stem laat lewe. Dit is inderdaad so dat 'n reus nie meer met ons is nie en dat hy mense oor 'n wye spektrum geraak het.