DA wittebrood verby sê ANC
Die voorneme van die Oudtshoorn-stadsraad
Vrydag, om Allen Paulse, munisipale bestuurder, te skors het opslae gemaak. Sedert dit bekend geword het dat Paulse 'n brief ontvang het waarin hy sewe dae gegee word om redes aan te voer waarom hy nie geskors moet word nie het vrae, aantygings en gerugte oral opgeduik.
Nasionale media het 'n mediaverklaring van die ANC in die Wes-Kaap as basis van 'n hele aantal berigte gebruik. Die verklaring begin met die stelling dat die wittebrood van burgemeester, Colan Sylvester, en Paulse verby is. In die verklaring voer die ANC aan dat die DA van Paulse ontslae wil raak omdat hulle nie daarin geslaag het om die gemeenskap te dien nie en dat die prosedure wat gevolg is, onregmatig was.
Die ANC se hoofsweep in Oudtshoorn, Jongilizwe Tyatya, het in die verklaring gesê dat Oudtshoorn onder leiding van die DA en die burgemeester, Colan Sylvester, sedert 2016 agteruitgegaan het.
In teenstelling hiermee het die DA se voorsitter van die staande kommissie vir plaaslike regering in Kaapstad op 27 Junie 'n verklaring uitgereik waarin hy sê dat die huidige administrasie Oudtshoorn se finansiële posisie binne drie jaar vanaf 'n negatiewe balans van R110 miljoen omgeswaai het tot 'n positiewe balans van R98 miljoen. Daarteenoor het die ouditeur generaal Oudtshoorn gekap oor onregmatige uitgawes van miljoene rande.
Op plaaslike vlak vra organisasies en inwoners wat die werklike redes is vir die stap om van Paulse ontslae te raak. Daar was groot verwagting dat 'n mosie van wantroue verlede Vrydag tydens 'n raadsvergadering deur opposie partylede in die DA-speaker, Julia le Roux, ingestel sou word. Die mosie is egter sonder verduideliking aan die media, Vrydagoggend voor die vergadering deur SARCO se raasdslid, Jevan Juthe, teruggetrek.
Die raadsbesluit om Paulse in kennis te stel van die voorneme om hom te skors het Vrydag tydens die raadsvergadering in komitee plaasgevind.
Dieselfde middag het inligting by die media uitgekom wat daarop gedui het dat die besluit nie deur al die DA-raadslede ondersteun is nie. Die besluit is egter met 'n meerderheidstem van DAraadslede deurgevoer. Volgens die ANC se verklaring het die raadslid van die EFF ook die besluit ondersteun. Dit kon egter nie deur die Oudtshoorn Courant bevestig word nie.
Navrae wat Maandag aan die Wes-Kaapse minister van plaaslike regering, Anton Bredell, gestuur is, is na die munisipaliteit as werkgewer van Paulse verwys. In 'n verklaring het die munisipale woordvoerder, Ntobeko Mangqwengqwe, bevestig dat Paulse volgens 'n raadsbesluit sewe dae geleentheid gegun word om redes te verskaf waarom hy nie geskors moet word nie.
Volgens die verklaring sê Colan Sylvester dat Paulse voorkomend geskors word, maar dat die raad nie tans beweringe oor wangedrag teen Paulse kan bekend maak nie. Paulse is sedert verlede week met siekteverlof tot 6 Julie. Hy het op 'n telefoniese navraag van die Oudtshoorn Courant gesê hy kan nie op hierdie stadium kommentaar lewer nie aangesien korrespondensie tussen hom en die raad nog moet plaasvind.
Die DA het teen Woensdag nie reageer op 'n navraag oor gerugte dat daar verdeeldheid onder die DA-raadslede is nie.