Vrou steek buurvrou dood
‘n Ma van vyf kinders van Matjiesrivier wat haar buurvrou met ‘n mes gesteek en aan strafbare manslag skuldig bevind is, is in die Oudtshoorn-streekhof ingevolge Art 276 (1) (i) gevangenisstraf van vyf jaar opgelê.
Hiervolgens sal sy vir minstens tien maande agter tralies moet deurbring voordat sy om parool aansoek sal kan doen.
Streeklanddros Ntsoki Moni het met vonnisoplegging gesê sy is geskok oor die talle vroue wat sedert sy vroeër vanjaar op Oudtshoorn begin werk het in die hof verskyn vir moord op hul mans of ander vroue. “Dit is kommerwekkend,” het die landdros gesê. Junene Coerecius (36) is van moord op haar buurvrou, Brenda Minnies (41), aangekla nadat sy haar met ‘n mes in die bobeen gesteek en Minnies haar doodgebloei het. Sy het onskuldig gepleit op die aanklag van moord omdat sy nie bedoel het om Minnies dood te maak nie.
Volgens haar was sy onder die invloed van alkohol en kwaad omdat Minnies haar van diefstal van ‘n hoender beskuldig het. Sy wou haar net seermaak.
Minnies het Coerecius ‘n paar weke voor die noodlottige voorval ook met ‘n mes gesteek waarvoor sy hospitaalbehandeling moes kry.
‘n Proefbeampte van die departement maatskaplike dienste, Kyle April, het in sy verslag aanbeveel dat Coerecius ‘n vonnis opgelê word waarvan sy ‘n gedeelte in die tronk moet deurbring omdat sy aan ‘n ernstige misdryf skuldig bevind is. Van haar familie is bereid om na haar vier minderjarige kinders om te sien en die hof moet ook kyk na die omstandighede van die oorledene wie se kinders nou sonder ‘n ma moet grootword.
Die staatsaanklaer, Willem Vister, het ook vir direkte gevangenisstraf gevra omdat ‘n opgeskorte of korrektiewe toesigvonnis nie die regte boodskap sal uitstuur nie.
Die landdros het bevind dat direkte gevangenisstraf die enigste gepaste vonnis sal wees. “Vroue misbruik alkohol en die belang van die gemeenskap kom ook sterk na vore,” het sy gesê.
Coerecius is ook onbevoeg verklaar om ‘n vuurwapen te besit en die landdros het ‘n bevel uitgereik dat die omstandighede van albei vroue se kinders vir ondersoek na die Kinderhof verwys word vir moontlike verwydering.