Vyf jaar vir seksuele aanranding
‘n Man wat ‘n 13-jarige meisie seksueel aangerand het, is verlede week in die Oudtshoorn-streekhof vyf jaar gevangenisstraf opgelê.
Streeklanddros Daniël Boks het met die vonnisoplegging van die 35-jarige Johan Jaftha, van‘ n plaas in die Oudtshoorn distrik, gesê hy hetsy vertrouensposisie misbruik.
Jaftha is deur die kind se ouers gevra om by haar te bly toe hulle nie vir die dag by die huis kon wees nie. Sy het haar teen hom verset deur hom met ‘n spieël waarmee sy besig was om haar hare te kam, te slaan, en probeer weghardloop.
Die man is aanvanklik aangekla van poging tot verkragting maar is aan seksuele aanranding skuldig bevind.
Die staatsaanklaer, adv. Michelle Weyers, het in haar betoog gesê dat die man aan ‘n ernstige oortreding skuldigbevind is en dit haar pla. Hy is nie ‘n eerste oortreder nie en toon ‘n geneigdheid om die soort misdaad te pleeg. Hy is voorheen opgeskorte vonnisse opgelê en die soort sake neem soms lank voordat dit na die hof gebring word.
Die kind is nou bang vir die beskuldigde en sit soms in ‘n hoekie en huil. Die enigste straf is direkte gevangenisstraf het sy afgesluit.
Die landdros het met vonnisoplegging gesê die kind moes haar teen ‘n volwasse man verset terwyl net hulle twee in die huis was.
Dit is ook kommerwekkend dat die kind deur familie van die beskuldigde geviktimiseer word.
“Vorige vonnisse het nie die beskuldigde afgeskrik nie en daarom moet ‘n swaarder vonnis die keer opgelê word,” het die landdros gesê. Jaftha het ten spyte van verdoemende getuienis teen hom enduit onskuldig gepleit. Hy het beserings opgedoen toe hy met die spieël geslaan is en die kind was gelukkig om van hom te ontsnap.
Hy het amper die kind statistiek van verkragting gemaak en die vonnis moet uiting gee aan die gemeenskap se uitroep vir swaar vonnisse vir seksuele oortredings,” het die landdros gesê.
Jaftha is vyf jaar gevangenisstraf opgelê en die hof het gelas dat sy naam in die nasionale register vir seksoortreders opgeneem word omdat hy skuldig bevind is aan ‘n seksuele oortreding teenoor ‘n kind.