Indringerplante moet reg verwyder word
As die beheer van indringerplante en grondrehabilitasie nie aandag kry nie, sit dit die Suid-Kaap op ‘n tydbom met betrekking tot die ekologiese omgewing en potensiële brande. So waarsku kenners oor die verwydering van indringerplante.
Die kenners, Sandy Haddad van S. Haddad Landboudienste, Heiner Dominick van Blue Planet, Johan Pieterse van Seedsmen Super Genetics en Stoffel Uys van Klein Karoo Akademie, het by navraag benadruk hulle het begrip vir die afkap van indringerplante.
Die proses moet egter van die begin af reg plaasvind. Meer moet gedoen word. Dit help nie net om indringerplante af te kap nie.
Na die brande in 2017 en 2018 is indringerplante afgekap, maar die oorblywende plantmateriaal is nie vernietig en/ of verwyder nie. Dit beteken dat die indringerplante, soos swartwattel steeds kan groei.
Die brande het ook die grond aktiwiteite nadelig beïnvloed.
Nadat die indringerplante verwyder is, moet die grond behandel word om al die biologiese aktiwiteite in die grond weer aan die gang te kry en te herstel. Daar moet in gedagte gehou word dat die grond beskadig is.
Tydens die bewerkingsproses moet verkieslik tussentydse groen bedekking (cover crop) geplant word. Hierdie tussentydse bedekking sal help om grondaktiwiteite, soos mikrobe-werking (grondorganismes), te stimuleer. Selfs fynbos kan op hierdie manier hervestig word.
Hulle het benadruk dit gaan nie net oor die rehabilitasie van die grond nie, maar ook oor die ekologiese moontlikhede vir die langtermyn.
Hulle het gewaarsku dat as die grond nie aandag kry nie, gaan die situasie net erger word, want die grond is biologies versteur en stimuleer die herontwikkeling en vermeerdering van indringerplante.
Met die regte hantering en behandeling van areas wat gebrand het en areas met hoë volume indringerplante, kan dit lei tot die herlewing van die natuurlike ekosisteme en die“brandstof”virbrandeindietoekoms tot die minimum beperk.
Natuurlike water beskikbaarheid mag ook verbeter met korrekte grond rehabilitasie, omdat indringerplante se populasie verlaag is. Van hierdie gerehabiliteerde gronde mag dalk weer voldoende wees vir produksie wat werkskepping en ekonomiese groei tot gevolg sal hê. Self gemeenskapslandbouprojekte mag dalk word op sulke gerehabiliteerde gronde begin word.