Bakkie tref lamppaal
‘n Werknemer van die Oudtshoorn-munisipaliteit (waterwese-afdeling) is Woensdagmiddag in ‘n botsing in Langenhovenweg beseer.
Die man wat alleen in die Toyota Hilux-bakkie was, het op die toneel gesê hy het net voor die botsing sy bewussyn verloor waarna die bakkie ‘n kragpaal op die middelmannetjie getref het.
Hy was die enigste insittende in die voertuig.
Hy was onderweg na die munisipaliteit se suiweringswerke buite die dorp toe die ongeluk plaasgevind het. Die bakkie het met die impak teen die lamppaal in die teenoorgestelde baan beland, sowat 40 meter van Smitswinkel Restaurant. ‘n Waterpunt wat langs die kragpaal is, is ook in die botsing beskadig waarna ‘n sterk stroom water verlore is.
Paramedici het die man op die toneel vir borspyne en ‘n gekneusde regterknie behandel en hospitaal toe geneem vir X-strale.