Een sterf in botsing
Die 46-jarige Samual Brandt van Blomnek, De Rust, is Maandagaand omstreeks 20:00 in ‘n botsing in De Rust se hoofstraat, Schoemanstraat, oorlede. Volgens kapt. Gert Fourie, bevelvoerder van De Rust-polisie, was die oorledene ’n passasier in ‘n wit Toyota Corolla toe die bestuurder beheer oor die voertuig verloor het.
Die motor het ‘n lamppaal aan die oorkant van die pad getref. Die impak van die botsing was op die passasiersdeur waar Brandt gesit het. Hy is op die toneel dood verklaar. Die Toyota was vanaf die dorp in die rigting van Oudtshoorn na Blomnek onderweg toe die botsing plaasgevind het.
‘n Inwoner wat naby die botsingstoneel bly sê hulle het die slag van die botsing gehoor en die motor in ‘n erf langs die pad gesien.
“Ek wou nog die polisie skakel toe hou hulle reeds daar stil,” het sy gesê.
Volgens Fourie is die bestuurder van die motor ook beseer en per ambulans hospitaal toe geneem. ‘n Klag van strafbare manslag word ondersoek.