Skokkende getuienis inVrydag Smartie Town-moordsaak
Hy het getuig dat hulle gesien het hoe Claassen met die vrou geslagsgemeenskap gehad het
Die saak teen die man van Smartie Town op Oudtshoorn wat daarvan aangekla word dat hy sy meisie in 2016 wreed vermoor en verkrag het, is in die streekhof met die getuienis van nog ‘n ooggetuie voortgesit.
‘n Matriekleerder het in Desember verlede jaar getuig dat hy gesien het hoe die 24-jarige Siphamandla Claassen, die aand van 8 Oktober 2016 vir Juliana Lingerveldt (26) met ‘n klip teen die kop kap, haar kaal uittrek en verkrag het.
Elton Oktober (20) het Maandag getuig dat hy ook gesien het wat die betrokke aand gebeur het toe hy en twee vriende in die donker agter ‘n bos gesit en Claassen dopgehou het.
Hulle het vroeër die aand saam by Claassen se huis gedrink. Claassen en Lingerveldt het later geloop waarna hy en sy twee vriende besluit het om hulle te agtervolg.
Hulle het agter ‘n bos naby die slagpale geskuil en gesien hoe Claassen vir Lingerveldt aan haar hare trek en op die grond neergooi. Hy het bo-op haar gaan sit, geklap en eers met ‘n kleinerige klip en daarna met ‘n groter klip teen haar kop gekap.
“Ons het terug gehardloop na Claassen se huis en na ‘n rukkie teruggekeer.”
Hy het getuig dat hulle gesien het hoe Claassen met die vrou geslagsgemeenskap gehad het en dat hulle so groot geskrik het dat hulle weer weggehardloop het. Die beskuldigde het later alleen by hulle aangesluit waarna hulle na hul eie huis is. Oktober het getuig dat hy bang was
vir Claassen en nie vir die polisie of sy ma van die voorval vertel het nie.
Hy het ‘n paar dae later weer na Claassen gegaan om hom te vra wat hy gedoen het nadat Lingerveldt se lyk naby die slagpale gevind is.
Volgens hom was Claassen verbaas oor wat hy hom meegedeel het en gevra om stil te bly en vir niemand te vertel nie.
Oktober het onder kruisverhoor getuig dat Claassen nie kan onthou wat die betrokke aand gebeur het nie.
Volgens Eugene Roos, Claassen se regsverteenwoordiger, sal ‘n man wat die oggend verby die moordtoneel gestap het getuig dat hy drie mans sien weghardloop het.
Oktober het hierop geantwoord dat dit nie hy en sy twee vriende was nie.
Claassen pleit onskuldig op die aanklag van moord en verkragting, maar wel skuldig op ‘n alternatiewe aanklag van strafbare manslag.
Hy erken in ‘n pleitverduideliking dat hy Lingerveldt een keer met ‘n klip teen die kop gekap het toe sy hom glo van ontrouheid beskuldig het.
Die saak word deur streeklanddros JC Nortjé aangehoor.