Trane oor nuwe huise
Trane van blydskap het verlede Vrydagoggend gerol toe twee huise wat deur ‘n bank gebou is, in 19de Laan Bongolethu, aan die eienaars oorhandig is.
Die huise is deur Standard Bank in samewerking met die Oudtshoornmunisipaliteit gebou as deel van die bank se sosiale verantwoordelikheid nadat dit verlede jaar as die munisipaliteit se bank aangestel is.
Die gelukkige huiseienaars is die 89-jarige Elizabeth Coerecius en die Blom-egpaar Koos (51) en Betty (50). Koos Blom is in ‘n rolstoel.
“Ons het ‘n nuwe vennoot in die voorsiening van behuising,” het die uitvoerende burgemeester, Colan Sylvester gesê.
Volgens Sylvester het Standard Bank nou ‘n saadjie gesaai waarmee hulle ‘n voorbeeld gestel het aan ander groot besighede en die hoop uitgespreek dat dit sal floreer en groei. “Die huise is ‘n hawe, nie net vir die eienaars nie, maar ook vir hul kinders en kleinkinders.”
Sylvester het ‘n beroep op die nuwe huiseienaars gedoen om ‘n testament op te stel omdat dit al dikwels in die verlede gebeur het dat families opbreek omdat daar nie ‘n testament opgestel is nie.
Gerrit du Toit van Standard Bank het in sy toespraak gesê die bank het in 2018 besluit om ‘n verskil in die Oudtshoorngemeenskap te maak en daar is besluit om te begin met die bou van twee huise..
Die ontvangers is deur die munisipaliteit geïdentifiseer en moes ouer as sestig jaar oud wees, of vir kinders wat sonder ouers grootword of gestremdes.
Du Toit het sy dank teenoor die bouer, Tusk Construction Support Services (Pty) Ltd uitgespreek en spesifiek aan Jessica Phiri en Dumisani Maluleki vir al die harde werk.