Rol moue op vir ‘n skoon dorp
Die maandelikse #trashtag skoonmaakprojek vind hierdie maand op Mandeladag, Donderdag 18 Julie plaas. Hierdie inisiatief van Trapsuutjieprojekte nooi inwoners en besighede om eenkeer per maand handskoene aan te trek en ‘n voorafbepaalde gedeelte van die dorp op te ruim. Mandeladag se opruiming vind plaas met die samewerking van die Oudtshoornmunisipaliteit, Cango Wildlife Ranch en inwoners van wyk 7 in Bridgton. Vrywilligers kom om 09:45 op die hoek van Asstraat en Wolfweg in Bridgton bymekaar. Die organiseerders hoop om weer soos verlede maand, ‘n hele aantal leerders te betrek. Die maandelikse skoonmaakdae word gewoonlik op Woensdae gehou, maar hierdie maand s’n is na Donderdag geskuif om met Mandeladag saam te val.
Vir meer inligting skakel Trapsuutjiesprojekte by 065 801 4810 of stuur ‘n e-pos aan carolinel756@gmail.com