Spring Roses skenk R2 000 vir Keagan
Spring Roses-rugbyklub het Saterdag, voor hul wedstryd teen All Blacks op die Bridgton-sportterrein, ‘n tjek van R2 000 aan die 14-jarige rugbyspeler, Keagan Coerecius, oorhandig. Keagan, wat op Oudtshoorn gebore is, is ‘n leerder aan die Hoër Landbouskool Oakdale.
Hierdie begaafde rugbyspeler is in Maart vanjaar gekies om in September saam met die Blue Crane-rugbyspan in Italië te gaan toer. Die Blue Cranerugbyspan is ‘n gekombineerde span wat gekies is na afloop van die Paarl Boys’ High-rugbytoernooi wat van
16 tot 24 Maart plaasgevind het. Paarl Gimnasium, Paarl Boys High, Menlopark, Hoërskool Monument, Hoërskool Brandwag, Duineveld en Paul Roos was van die tradisionele swaargewig rugbyskole in Suid-Afrika wat aan dié toernooi deelgeneem het.
Volgens Willie Wagenaar, sekretaris van Spring Roses, is die klub trots om met ‘n plaaslike belowende rugbytalent soos Keagan geassosieer te word. Hy het ook ‘n beroep op ander rugbyklubs op Oudtshoorn gedoen om Keagan finansieel by te staan.
“Spring Roses moet natuurlik die eerste klub wees waar hy sy rugbytalente moet kom uitleef na sy skoolloopbaan,” het Wagenaar geskerts.