Hekelwoorde ryg pryse in
Om 'n boek self uit te gee en meer as 3 300 kopieë te verkoop getuig van harde werk, maar veral van kwaliteit. Dit is die geval met Tania Smit se boek, Hekelwoorde van my hart, wat sy verlede jaar in September bekendgestel het.
Die boek bevat 102 van haar rubrieke en gedigte wat sy op haar blog met dieselfde naam het. Illustrasies is deur Glendine, die bekende kunstenaar van De Rust.
Volgens Smit het sy aanvanklik uitgewers genader, maar 'n koue skouer gekry.
"Ek het toe besluit om 'n onafhanklike uitgewer wat selfpublikasies van gehalte uitgee, te nader en ek is nie 'n dag spyt oor die besluit nie," het sy hierdie week met haar terugkeer van die Boekbedonnerd-fees in Richmond gesê.
By die fees het sy twee Boekbedonnerdpryse ingepalm.
"Ek was die naaswenner van die Boekbedonnerd-prys vir die beste publikasie van 2019 sowel as die wenner van die mees inspirernede boek van 2019."
Volgens haar fokus die Boekbedonnerdfees daarop om die kollig te plaas op onafhanklike skrywers en het jaarliks uitstekende sprekers op die program. Die toekennings is verlede Donderdag tydens 'n gala-aand in Richmond gemaak.
Oor die pad van selfpublikasie sê Smit: "Ek vermoed enige skrywer wat gedwing is om self te publiseer omdat hulle manuskrip afgekeur is deur ‘n hoofstroom uitgewer, hunker maar altyd na een of ander vorm van erkenning - veral van die uitgewersbedryf. Ek is bevoorreg dat ek ‘n gevestigde Facebook-blad het met baie mense wat my volg en gereeld waardering gee vir my skrywes, maar tog is daar ‘n monopolie in die uitgewersbedryf ten opsigte van resensies, onderhoude, mediablootstelling, spesifieke feeste en publikasies wat hoofstroom uitgewers eksklusief vir hulself en hulle eie skrywers annekseer.
Dit is geweldig frustrerend omdat onafhanklike skrywers nooit regtig die geleentheid kry om met hoofstroomskrywers te kan meng of kompeteer nie.
Dit is vir my jammer, en ek is passievol om die hoofstroom uitgewers verkeerd te bewys – daar is baie uitstekende onafhanklike skrywers daar buite wat ook verdien om op dieselfde platforms te kan kompeteer en erkenning kry."
Die Boekbedonnerd-fees is vanjaar vir die 12de keer aangebied en volgens Smit is dit vir haar die mees inspirerende fees waaraan sy nog deelgeneem het.
Wat haar sentiment oor uitgewers aanbetref skuur sy skouers met bekendes soos onder andere die digter Clinton V du Plessis.
Hy het juis Woensdagaand op die televisieprogram Ek wou nog sê, gesê hy het sy eerste digbundel in die 1980's deur Perskor uitgegee en sedertdien al sy ander bundels self uitgegee, juis omdat hy voel die groot uitgewers ag sommige skrywers en digters nie na waarde nie. Hy is ook sover bekend, die enigste digter wat geweier het dat André P Brink van sy gedigte in die nuwe Groot Verseboek opneem, juis as gevolg van die negatiewe kritiek wat hy destyds ontvang het. Hy meen dit is nie billik dat 'n gerekende skrywer jou eendag as minderwaardig ag en dan later as dit hom pas, van jou gedigte wil gebruik nie.
Smit se raad aan mense wat self wil publiseer is, "Sorg dat jy 'n goeie redakteur kry, sorg dat jou manuskrip goed taalkundig versorg is, betaal iemand vir 'n professionele uitleg en laat die drukwerk deur 'n gevestigde drukker gedoen word, en dan begin die harde werk. Dan moet jy op elke moontlike platform bemark."
Hekelwoorde van my hart is beskikbaar by www.hekelwoorde.co.za