Leesfees begin vandag
Die Prins Albert-leesfees begin amptelik vandag met 'n propvol program. Die gewilde fees duur tot Sondag.
Verskeie nuwe publikasies van bestaande en debuutskrywers word bekendgestel.
Die leesfees is weer by die Jans Rautenbach Schouwburg wat sentraal geleë is en daar is 15 verskillende gesprekke sowel as twee skryfslypskole en werksessies vir skoolleerders. Die wenners van die leesfees se skryf- en digkompetisie word ook tydens die leesfees aangekondig. Die program is so beplan dat gesprekke nie oorvleuel nie en feesgangers dus elke gesprek kan bywoon.
Die bekende fotograaf Louis Botha se nuutste glansboek N/a'an ku sê word bekendgestel.
Ander hoogtepunte op die program is 'n gesprek van die digter Pieter Hugo met die bekende volksverteller, Dana Snyman.
Daar is ook 'n Afrikaanse gesprek tussen Pieter Hugo (Alchemie van my muse) en Hannes Visser (Die jaar toe pa...) en 'n Engelse gesprek oor digkuns tussen drie digters, Annette Snyckers (Remnants, Restante, Reste), Archie Swanson (the shores of years) en Helen Moffett (Prunings).
Zephany Nurse (Miché Solomon) en die skrywer van haar boek Zephany: Two mothers, one daughter, Joanne Jowell, gaan ook oor die boek gesels.
Ander skrywers wat van nader geleer ken kan word is Anzil Kulsen, 'n getroue deelnemer aan die fees, Sally Andrews met haar gewilde Tannie Maria-boeke, Fred Khumalo, Jan van Tonder, Melissa A Volker, Dawn Garisch, Olivia M Coetzee en Mike van Graan.
Die Schouwburg het beperkte aantal sitplekke dus is dit veiliger om vooraf te bespreek.
Vir kaartjiebesprekings gaan na princealbertleesfees.org of skakel 023 541 1014.