EFF-lid bly MPAC-voorsitter
‘n Voorstel van Icosa en Sarco, dat die voorsitter van MPAC (Municipal Public Accounts Committee), rdl. Diswayne Maarman (EFF) vervang word is Dinsdag tydens ‘n spesiale raadsvergadering van die Oudtshoorn-munisipaliteit met dertien stemme teenoor agt verslaan. Die hoofswepe van Icosa en Sarco, Vlancio Donson en Jevan Juthe, vra die raad in ‘n skrywe dat Maarman nie verder as lid van MPAC dien nie omdat hulle nie tevrede is met sy werk nie. Volgens hulle het Maarman nog geensins met Icosa of Sarco gekonsulteer met betrekking tot enige item of insette rakende MPAC vergaderings sedert hy daarop dien nie.
Hulle skryf verder dat hulle alle vertroue in hom verloor het en versoek die raad om rdl. Gavin Juthe aan te wys om die kleiner partye in die raad te verteenwoordig en met onmiddellike effek as lid van die komitee aan te stel.
Die burgemeester, rdl. Colan Sylvester, het egter ‘n teenvoorstel ingedien waarin hy vra dat Maarman as voorsitter behou word, wat met dertien stemme teenoor agt aanvaar is.
Donson en Juthe het die speaker hierna gevra dat hul teenstemme aangeteken moet word.
Die MPAC bestaan uit vyf lede wat ‘n oorsigrol het in die finansies van die munisipaliteit. Sou die raad byvoorbeeld onduidelikheid het oor spesifieke uitgawes, word IMPAC gevra om dit te ondersoek en terugvoering te gee. Daar is vyf raadslede op IMPAC wat bestaan uit verteenwoordigers van die
DA (3), ANC (1) en kleiner partye (1). Daar is ook tydens die raadsvergadering eenparig besluit om alle vakante poste in die onderskeie direktorate van die munisipaliteit te vul.
Die besluit om nou die vakante poste te vul volg nadat die burgemeesterskomitee, hoofswepe van al die politieke partye en senior bestuur daaroor besin het.
Volgens die verslag het die onderskeie direkteure voorleggings ten opsigte van die vul van kritieke vakante poste gemaak. Die onderburgemeester, Noluthando Mwati, het die voorstel ingedien wat deur rdl. Jerome Lambadjeen gesekondeer is. Mwati het beklemtoon dat die vul van die poste nie enige bykomende uitgawes vir die raad sal meebring nie omdat reeds daarvoor begroot is. Volgens die verslag is daar tans agtien vakante poste wat gevul moet word.
In die aanbeveling word dit ook duidelik gestel dat werknemers in die poel voorkeur kry sowel as voormalige werknemers met arbeidsake teen die munisipaliteit.
Die vakatures as hoof van tegniese dienste en hoof van finansies ook bespreek. Die twee poste het vakant geraak toe Chris Koch en Felix Lötter verlede maand bedank het. Volgens verskeie bronne het hulle bedank uit radeloosheid uit met die politieke struwelinge in die raad wat hulle in die uitvoering van hulle pligte gekortwiek het. Die vakatures is in komitee bespreek en daar is onder ander beraadslaag oor waarnemende persone en riglyne vir die aanstelling van kundige persone. Die poste word tans geadverteer.