Amptenare praat met inwoners
‘n Groep inwoners van drie informele nedersettings in Oudtshoorn het verlede Vrydag ‘n wettige, vreedsame optog na die munisipale depot in Dassieweg gehad om
‘n memorandum aan munisipale amptenare te oorhandig.
Die inwoners van GG-kamp, Kanale en Black Joint eis behuising en werksgeleenthede. Hulle het ook gevra dat daar meer aandag aan die skoonmaak van die informele nedersettings gegee word. Shehaam Sims (direkteur van behuising), Thomas Matthee (direkteur van gemeenskapsdienste), Reginald Smit (direkteur van koöperatiewe dienste) en Allen Paulse (munisipale bestuurder) het die inwoners toegespreek.
Volgens Sims was sy Donderdagaand met
Asla in gesprek oor ‘n behuisingsprojek in
GG-kamp. Sy het gesê dat sy die planne en ander besprekings met Asla moet finaliseer en hoop om op 5 November die voorstelle van Asla na die inwoners te bring sodat sy dit met hulle kan bespreek. Volgens haar behoort hulle vir ongeveer 400 mense huise te kan gee.
Paulse het gesê dat daar ook besprekings is oor werksgeleenthede vir inwoners, maar dat daar slegs 49 mense per kwartaal aan so ‘n projek kan werk.
Volgens hom is die daar nog niks gefinaliseer nie en weet hy ook nie wanneer die projek gaan begin nie. Matthee het gesê dat die projek die skoonmaak van woonbuurte insluit.
Mlandeli Nyuka, die sameroeper van die optog, het gesê hy beskou die geleentheid van vandag as geslaag. “Ons kon antwoorde by amptenare kry waarvoor ons baie dankbaar is. Ek is veral trots op die feit dat ons in ons doel geslaag het sonder enige geweld en bande wat gebrand is.”