Goeie bemarkingsmaand vir toerisme

Oktober was ‘n suksesvolle bemarkingsmaand vir die Oudtshoornen De Rust-toerismeburo. Hulle het die streek by drie verskillende toerismeaangeleenthede bemark.

Lede van die Kango-grotte, Oudtshoornen De Rust-toerismekantoor en Cango Wildlife Ranch het die streek en die produkte by die Gauteng GetaWay Show in Johannesburg aan die publiek bemark.

Volgens Tammy Moult, die nuwe voorsitter van die buro, is die twee grootste doelwitte van die buro om sterk verhoudinge in die toerismebedryf te bou en om elke geleentheid wat in hulle rigting kom aan te gryp.

“Daarom is geleenthede soos die GetaWay Show so belangrik. Ons internasionale mark is op ‘n afwaartse kurwe en daarom is dit belangrik om van plaaslike geleenthede soos dié gebruik te maak om verbruikers in te lig van wat in ons omgewing aangaan. Ons is geseën om in ‘n land te woon waar reisavonture oral in ons land beskikbaar is, en ons wil hê Oudtshoorn en die Tuinroete moet op almal se lippe wees.”

Volgens haar is dit egter steeds belangrik om die buitelandse mark ook te bereik en het hulle ook aan twee werksessies deelgeneem waar hulle die geleentheid gehad het om die streek aan verskeie toeroperateurs te bemark.

Die SATSA (South African Tourism Services Association - Garden Route Chapter) MegaFam 2019 is in George gehou en die SAT (South African Tourism) Speed Marketing Workshop in Tsitsikamma.

“By werksessies word die streek aan hoogsaangeskrewe toeroperateurs, wat reeds besigheid in Suid-Afrika doen of nog beplan om te doen, bemark. Hier is die bou van verhoudings van kardinale belang. Die terugvoer van ons dorp by alle platvorms is baie positief, veral by kliënte wat al in ons streek gekuier het. Volgens die agente is veral ons gasvryheid noemenswaardig.”

Moult sê die buro werk hard aan bemarking vir die Desembervakansie wat voorlê.