Coetzer SWD-mansatleet van die jaar
Oudtshoorn se veteraanatleet, Johann Coetzer, is verlede week as die SWD Meesters Atletiek se mansatleet van die jaar bekroon. Om vir hierdie gesogte toekenning in aanmerking te kom moes Coetzer aan al SWD se prestasiestandaarde voldoen. Hy moes ook vir langer as twee jaar 'n geaffilieerde lid van SWD-atletiek wees en ook vir dieselfde periode 'n opbetaalde lid wees.
Coetzer is reeds vir meer as vyf jaar 'n lid en opbetaalde lid van die SWD Meesters Atletiek. Hy sê dat hy reeds vanaf 1999 by meestersatletiek betrokke is. In totaal het hy sedert hierdie tydperk aan 12 SWDatletiekbyeenkomste, drie OPbyeenkomste, drie WP-byeenkomste, vyf Vrystaat-atletiekbyeenkomste en vyf
SA atletiekbyeenkomste deelgeneem waarvan hy 'n allemintige 89 medaljes (55 goud,
25 silwer en
9 brons) verower het.
Wat rekords betref het
Coetzer ook SWD-rekords in die verspringafdeling (mans 50, 55 en 60 ouderdomsgroep), driesprongafdeling (mans 40, 50 en 55 ouderdomsgroep) en hoogspring (55 en 60 hoogspring) opgestel. By die SA atletiekkampioenskappe in Mei vanjaar het hy ook in die verspring (goud) en hoogspring (silwer) in die mans bo 60 ouderdomsgroep opgestel en vir nasionale kleure gekwalifiseer.
Volgens Coetzer het hy nooit noemenswaardig op skoolvlak in atletiek uitgeblink nie en het die atletiekgogga hom eers laat in sy lewe gebyt. Hy sê dat hy een keer vir die 100 m tussen jong mans aangetree het waartydens hulle grappies gemaak het oor sy ouderdom. "Ek het aan hulle genoem dat daar sommer nog baie woema in hierdie ou bene is. In dié wedloop het ek vierde geëindig en die einste grapmakers lelik op hul neuse laat kyk, vertel Coetzer skertsend.
Coetzer het ook verlede Vrydag aan die Nationale Golden Oldies Games in Port Elizabeth deelgeneem waar hy 'n tweede plek in die 200 m in die ouderdoms-groep vir mans bo 60 losgehardloop het. Sy volgende atletiekbyeenkoms is 9 November in Bloemfontein (Vrystaat) waar hy aan die Vrystaat meestersatletiekbyeenkoms in die verspring en hoogspring items sy slag gaan wys.