Bruiners bult spiere in hekkies
Antonio Bruiners (14), gebore Oudtshoorniet en gr. 9-leerder van Hoërskool Outeniqua in George, het verlede maand groot welslae in die hekkie-afdeling by twee groot atletiekbyeenkomste behaal.
Op 12 Oktober het Bruiners by die Spar Kwaggas Top-10-atletiekbyeenkoms sy eie rekord in die 100 m-hekkies gebreek. Hy het ook by die Bredasdorp Top-10atletiekbyeenkoms onderskeidelik 'n silwer- en bronsmedalje in die 300 m- en 100 m-hekkies ingepalm. Bruiners het aanvanklik sy hoërskoolloopbaan by Langenhoven Gimnasium begin, maar sy ouers het vanjaar besluit om hom vanaf die tweede kwartaal na Hoërskool Outeniqua te skuif. Volgens sy ma, Antionette Bruiners het sy en haar man (Johann) gevoel dat hul seun meer blootstelling en aan strawwer kompetisies by sy huidige skool sal deelneem. "Langenhoven Gimnasium bly steeds 'n topskool, en ons is dankbaar vir die geleenthede wat dié skool vir ons seun gebied het." Nie net is Bruiners ook in die elite o.16 SWD-rugbygroep opgeneem nie, maar is hy ook vir o.15 SWD-krieketgroep gekies wat vanaf 5 tot 9 Desember in Oos-Londen aan 'n nasionale kriekettoernooi sal deelneem.
Benewens sy veelsydige sportprestasies spog Bruiners ook met 'n 83% algehele slaagpersentasie wat hy tydens sy Septembereksamen behaal het.
"Ons wense vir ons seun is dat hy nederig sal bly en altyd 'n goeie balans tussen sy studies en sport moet handhaaf, het sy ma bygevoeg.”