DA lê klagtes teen uitvoerende burgemeester
Die aard van die klagstaat wat verlede Vrydag deur die DA se federale uitvoerende raad aan Colan Sylvester, die burgemeester van Oudtshoorn, voorgelê is, is nie amptelik aan die media voorsien nie, maar daar is verskeie verwysings daarna op sosiale media.
Op die openbare blad, Openbaarmaking in Oudtshoorn, is ‘n plasing waarin gesê word daar is 11 klagtes en “die meeste van die klagtes is gegrond op die slegte verhouding tussen hom (Sylvester) en die munisipale bestuurder, Allen Paulse”.
Volgens die plasing begin Sylvester se verhoor op 20 November.
Die Oudtshoorn Courant se navraag aan die DA is na Helen Zille, voorsitter van die DA se federale raad, verwys. Sy het die volgende reaksie gestuur, maar nie op spesifieke vrae oor die aard en inhoud van die klagtes gereageer nie.
“We have furnished the mayor with a notice of a disciplinary hearing, as the Democratic Alliance takes all allegations of misconduct seriously, and we hold all our office bearers accountable.
We further respect the principles of natural justice and also ensure that our panel set up by our independent Federal Legal Commission hears out the mayor’s version of events, impartially, before this independent panel comes to a judgement. Our disciplinary processes are divorced from our internal politics and are as objective as possible.”
Die klagtes volg nadat die burgemeester sowat twee maande gelede deur die DA se federale raad gedwing is om ses weke verlof te neem terwyl hulle klagtes teen hom ondersoek.
Die onmin tussen die burgemeester en sommige raadslede aan die een kant en die munisipale bestuurder en raadslede wat hulle by hom skaar, was ook die onderwerp van ‘n gesprek wat Anton Bredell, minister van plaaslike regering verlede maand met belanghebbendes in die dorp gevoer het.
Tydens daardie vergadering het Bredell gesê as minister kan hy nie toelaat dat politieke- en persoonlike agendas Oudtshoorn weereens in die moeilikheid dompel nie en dat hy iets daadwerkliks gaan doen om dit te verhoed.
Hy het egter nog nie aangedui presies watter stappe gevolg gaan word om in te gryp nie. Intussen is daar groot verdeeldheid onder inwoners van Oudtshoorn ten opsigte van lojaliteit teenoor die burgemeester.
Een groep is van mening dat hy die oorsaak is van die huidige wankelrige situasie in die dorp se bestuur en die bedanking van twee senior amptenare, terwyl ander weer glo hy is die slagoffer van ‘n smeerveldtog deur die DA.