Skrywers kyk deur ander lense
As ons begin met bewaring beteken dit ons het reeds iets opgemors en mense moet ophou “moan” en Steve-Steve speel en eerder dink aan hoe hierdie land vorentoe opgebou kan word. Dave Pepler, bekende bewaringskundige en Dana Snyman se sentimente hierbo was maar twee van verskeie gedagtes wat die meer as 15 deelnemers aan die afgelope naweek se Prins Albert-leesfees gedeel het. Gesprekke oor misdaad, resepte, kinderhandel, bewaring, nostalgie, die digkuns en fotografie was deel van die naweek se program.
Soos gewoonlik was dit ook nie slegs ‘n fees van luister nie. Skrywers en kundiges soos Anzil Kulsen, Zelda Bezuidenhout, Nadine Blom, Jitsvinger en dr. Mia Oosthuizen, het werksessies aan volwassenes en hoërskoolleerders aangebied. Daar was selfs ‘n paartjie van Welkom wat die skryfsessies deur Mia Oosthuizen kom bywoon het.
Die skryfsessie wat Saterdagoggend by Hoërskool Zwartberg deur Anzil
Kulsen,
Nadine Blom en Zelda Bezuidenhout aangebied is, is deur 21 leerders van die skool bygewoon. Twee van hulle, Amirah Delport (poësie) en Romann Steenkamp (prosa) het die vorige aand pryse ontvang vir hulle inskrywings aan die jaarlikse skryfkompetisie wat deur die leesfees aangebied word.
Dat skrywers en boeke groot ondersteuning geniet, was duidelik met wat tydens die rugbyeindstryd gebeur het. Die komitee moes besluit of die twee gesprekke met die skrywers Sally Andrew en Fred Khumalo wat op dieselfde tyd as die rugbyuitsending sou plaasvind, moes voortgaan. Daar is besluit om die program onveranderd te hou en met albei gesprekke was die teater byna vol.
Die besluit om die leesfees vanjaar weer by die Jans Rautenbach Schouwburg aan te bied is aanvanklik met gemengde gevoelens begroet, maar volgens feesgangers was dit ‘n goeie besluit aangesien die Schouwburg sentraal geleë is en, soos een van die feesgangers gesê het: “Die skouterrein sou Saterdag met die rugby nie gewerk het nie, die plek het van vroeg af gekook met rugbyondersteuners en dit sou beslis die feesprogram omvergegooi het.”
Die Prins Albert-leesfees is vanjaar vir die agste keer aangebied en volgens die organiseerders is die fees hier om te bly. Dit blyk dat skrywers uiters geneë is om aan die kleiner feeste in die land deel te neem en van die feesgangers verkies ook die kleiner feeste.
‘n Paartjie van Beaufort-Wes wat die vorige week die Boekbedonnerd-fees op Richmond bygewoon het, het gesê met die kleiner feeste kry besoekers die geleentheid om rustig met skrywers te sit en gesels en hulle beter te leer ken.