Bosasa staatskaping uit die “perd se bek”
Wat gebeur as jy ’n land se regering, sy té warm vriendskap met ’n maatskappy en ’n vreemde, ekshibisionistiese godsdienstigheid saamklits?
Jy kry die misdaad van staatskaping; ’n ernstig gekompromitteerde staatspresident; en ’n man wat, tot die dag van sy dood in Augustus vanjaar, ’n klomp werkers deur vrees en gebed beheer het. Dis die kombinasie Jacob Zuma, Gavin Watson en Bosasa …’n onderneming met ’n koperplaat by sy hoofingang, gegrond op Deuteronomium 28:6: “Geseënd is jy wanneer jy inkom, en geseënd is jy wanneer jy uitgaan.”
Maar mense wat met dié twee saamgewerk het - Zuma wat in skande sy pos moes ontruim en die stinkryk Watson wat in ’n Toyota teen ’n betonpaal gesterf het - het ook in vrees geleef omdat hulle aan ’n skrikbewind onderwerp is.
Dis die kern van
Adriaan Basson, hoofredakteur van News24, politieke ontleder en skrywer, se boek Blessed by Bosasa: Inside Gavin Watson’s state capture cult, wat einde Oktober verskyn het. Basson, bekend vir sy vreesloosheid as politieke en ondersoekende joernalis, stel dié opspraakwekkende boek op Saterdag 23 November op Prins Albert bekend. Hy is ook die skrywer van onder meer Enemy of the People: How Jacob Zuma stole South Africa and how the people fought back.
Basson, wat al dikwels vir sy werk bekroon is, het die Bosasa-storie in 2006 begin ondersoek toe hy by Beeld gewerk het, waar hy later ook redakteur was. Hy is sedert 2016 hoof van News24.
Sy pa, Johan ‘n afgetrede skoolhoof, is tydelik in diens van die privaatskool Christen
Akademie op Prins Albert. Dié skool reël die geleentheid in samewerking met die uitgewer Jonathan Ball.
Basson se gespreksleier op 23 November is die bekende radiopersoonlikheid en skrywer Dawid van Lill. Die gesprek vind plaas by Ou Kelder op die plaas Drie Riviere, 7 km buite die dorp.
Bosasa is ’n boeiende, senutergende ondersoek na die ongelooflike verhaal van hoëvlakkorrupsie en staatskaping in die naam van godsdiens en BEE. Basson ontbloot dié donker, kultustipe onderstrominge van Gavin Watson se misdadige maatskappy wat die ANC en talle skelm kamerade gefinansier het terwyl hulle die land se belastingbetalers leeggesuig het.
Dié nuusman se weiering om sy oopkrapwerk te staak, het dikwels tot dreigemente en beswaddering gelei.
Die verhaal eindig met die verwydering van Zuma uit sy posisie (wat hy as onaantasbaar beskou het), ondersoeke deur die Zondo-kommissie, en die ontdekking dat, tussen 2003 en 2018, regeringstenders van oor die R12 miljard aan Bosasa en sy filiale toegeken is.
“Ek voel steeds ’n diep woede teenoor die Suid-Afrikaanse regstelsel wat Watson en Bosasa so lank toegelaat het om met hul misdade weg te kom,” skryf Basson.
Volgens hom dra hy sy boek op aan die dapper fluitjieblasers wat hul lewens en loopbane op die spel geplaas het om joernaliste in hul ondersoekwerk na dié staatsrooftog te help.
“Ek dra dit op aan Vernie Petersen en elke ander fluitjieblaser wat met ’n gebroke hart gesterf het. Jul stryd was nie tevergeefs nie.”
Inligting oor die bekendstelling kan bekom word by Prins Albert-biblioteek, 023 5411 034, en die skool, 023 5411 750.