Klaarstroom se Goederestoor gooi deure oop
Klaarstroom het pas nog ‘n rede vir stilhou bygevoeg. Die Klaarstroom Goederestoor wat in die hoofstraat opgerig is, is die afgelope naweek met groot ondersteuning geopen.
Die Goederestoor is die inisiatief van Frans en Salomie Steenkamp van Klaarstroom. Dit is geleë op ‘n deel van hulle plaas wat aan die dorp se hoofstraat grens. Hulle het ook die hotel ‘n aantal jare gelede gekoop en ten volle gerestoureer.
“Die doel van die Goederestoor is om ‘n ruimte te skep waar plaaslike inwoners ‘n groot verskeidenheid van kuns, handwerk en die vrug van hul hande, soos beskuit, kleinkoekies, koeksisters, fudge, biltong, konfyte, lekkernye en allerlei gebottelde lekkertes te koop kan aanbied,” sê Eunice Visser, wat reeds jare op die dorp woon waar sy en Koos Roets hulle met die filmbedryf bemoei.
Behalwe vir handgemaakte produkte is daar ook ‘n kwekery met veral geharde plantjies soos vetplante en malvas en daar word ook beoog om kankerbos te kweek.
Maar, die Goederestoor se doel strek ook verder as bloot ‘n afsetpunt vir produkte. Dit het ook ten doel om ‘n samehorigheidsgevoel onder die inwoners sowel as die omliggende boerderygemeenskap te skep, veral tydens ‘n verskeidenheid van kreatiewe werksessies. Daar word veral klem gelê op herwinning tydens die skep van ware vir die stoor. Dis ‘n inisiatief wat ook ten doel het om inwoners die geleentheid te bied om hulself finansieel te bemagtig.
Die hoogtepunt van die naweek se opening was ‘n kookkompetisie wat groot belangstelling geniet het. Persone wat hul ware uitstal het elk hul eie rak, terwyl daar ook ‘n gemeenskapsrak is waar produkte wat tydens werksessies geskep is, te koop aangebied en die opbrengs gebruik word om benodigdhede vir opkomende werksessies aan te koop.