Uit die raadsaal
Verskeie sake is verlede week tydens 'n spesiale raadsvergadering hanteer. Aangeleenthede wat met aanstellings en vakante poste verband hou, is in komitee hanteer.
Famsa se aansoek terugverwys
Die aanbeveling van Allen Paulse, die munisipale bestuurder, dat Famsa Karoo vrygestel word van eiendomsbelasting op hul gebou in Kerkstraat is tydens die vergadering vir verdere ondersoek terugverwys.
Rdl. Jevan Juthe (Sarco) wou weet of die eiendom op die naam van Famsa geregistreer is. Die bedrag ter sprake vir die 2019/20 boekjaar is R19 878. “Die munisipaliteit moet seker maak of Famsa wel die eienaars van die gebou is en of dit van iemand anders gehuur word,” het Juthe gesê.
Die speaker, Julia le Roux-Krowitz, het hierop beslis dat die aanbeveling terugverwys word om seker te maak. Volgens 'n skrywe van Franzu Badenhorst, hoof- uitvoerende beampte van Famsa Klein Karoo, is die organisasie 'n nie-winsgewende organisasie en beskik oor 'n vrystelling van belasting sertifikaat.
Langtermynlenings goedgekeur
'n Voorstel is gemaak dat die Oudtshoornmunisipaliteit oor die volgende drie jaar lenings ter waarde van R45 miljoen, aangaan vir die finansiering van kapitaalprojekte soos gereflekteer in die kapitaalbegroting vir 2019/20 - 2021/23,
Rdl. Jevan Juthe wou weet of die munisipaliteit goedkeuring of enige insette van provinsie gekry het. Volgens hom betaal die munisipaliteit reeds af op 'n lening van R40 miljoen. Volgens die voorsitter van die raad se finansportefeulje, George Kersop, is die provinsie oor die beoogde lenings ingelig, maar is geen terugvoer ontvang nie.
Juthe het hierop voorgestel dat die aangeleentheid terugverwys word omdat die lenings verdere las op inwoners sal plaas met tariewe wat sal styg terwyl hulle reeds swaar trek. Kersop het die voorstel teengestaan omdat die geld vir belangrike kapitaalprojekte benodig word.
Van die projekte wat reeds deur die raad goedgekeur is, is 'n nuwe pypleiding vanaf die Huisrivier na De Rust (R3,4 miljoen), die opknapping van reservoirs (R3,5 miljoen) herstel van strate en stormwaterpype in Oudtshoorn (R3 miljoen), waterpypvervangings (R3,2 miljoen) en rioolpypvervangings (R3,2 miljoen).
Die voorstel deur Kersop om die lenings aan te gaan, is deur rdl. Jerome Lambatjeen gesekondeer en met 13 stemme teenoor sewe aanvaar.