Lang pad van herstel na botsing
Die bestuurder van die Audi TT wat Sondag saam met twee vriende in ‘n ernstige botsing betrokke was, was teen gister nog in die hoësorg-eenheid van die George Mediclinic.
Stiaan Swart en twee vriende, Sarel-Blaco Kleyn en AJ Koen, was Sondagmiddag omstreeks 13:00 met Langenhovenweg oorkant die Oudtshoorn Vaardigheidskool onderweg toe ‘n wit Toyota Corolla voor hulle vanuit die regterbaan na die linkerbaan beweeg het. Die Audi het die Toyota links agter getref waarna die Audi twee bome langs die straat getref het voordat dit deur ‘n tuinmuur gebars het. Koen wat agter in die motor gesit het, kon deur die luikrug uitkom en het gesigsbeserings opgedoen. Swart en Kleyn is egter in die motor vasgekeer en is bevry nadat reddingswerkers die bestuurdersdeur van die Audi verwyder het. Koen is na behandeling in die Georgehospitaal ontslaan, maar Swart en Kleyn is na die George Mediclinic oorgeplaas. Die twee Belgiese toeriste in die Toyota Corolla was erg geskok, maar ongedeerd.
Johan Swart, Stiaan se pa, het gister gesê hulle hoop dat Stiaan gister uit die hoësorgeenheid sou kom.
“Hy het ‘n ernstige hoofbesering opgedoen, daar is ‘n fraktuur in sy skedel en bloeding op sy brein,” het hy gesê. Hy en sy vrou was Sondag op die botsingstoneel terwyl hulle seun en Kleyn nog in die voertuig vasgesit het. Hy het gesê die neuroloog het hulle gerusgestel dat die bloeding op Stiaan se brein self sal afneem en dat ‘n operasie nie nodig is nie. “Hy (die neuroloog) het egter gesê Stiaan gaan vir ten minste ses weke nie kan werk nie en dat hy ‘n lang pad van herstel voor hom het. Ons is net dankbaar dat al drie van hulle lewendig uit die wrak kon kom”.
Die eienaar van die huis waar die Audi deur die muur gebars het, het gesê dit is al die derde ernstige botsing wat op die hoek van Albertstraat en Langenhovenweg plaasgevind het, waarvan hy weet. Hy en sy gesin was Sondagmiddag in die huis toe hulle die slag en geskreeu van bande gehoor het. “Ons het gedink dis weer voor in die straat, maar toe sien ons die kar is amper in ons erf.”