Werker van die jaar beplan om voorman te word
‘n Jong landbouwerker van Welbeplanplase is aangewys as die beste algemene werker in die Wes-Kaap. Marius Joseph was een van die 12 kategoriewenners van die Klein-Karoo se landbouwerker van die jaar wat sowat twee maande gelede gehou is.
Hy is toe aangewys as die Klein-Karoo se wenner in die kategorie, algemene werker. Hy en sy 12 medefinaliste het na die provinsiale rondte deurgedring en hy is op 2 November by die Nederburg wynlandgoed in die Paarl as die beste algemene werker in die Wes-Kaap aangewys. Die 35-jarige Joseph het Dinsdag aan die Oudtshoorn Courant gesê die beoordeling in die Paarl was nie vir hom moeilik nie. “Hulle het my uitgevra oor my werk, maar ek moes ook voorstelle gee oor hoe ek my afdeling sou verbeter en wat ek anders sou doen om die droogte se uitwerking te veminder.”
Hy het die titel voor 16 ander finaliste van oor die provinsie heen, weggeraap. Sy bestuurder, Hentie Truter, het hom verlede jaar ook vir die kompetisie ingeskryf en hy het toe die tweede plek in die Klein-Karoo behaal. “Dit was my inspirasie om hierdie jaar nog beter in my werk te wees,” het hy gesê. Joseph is reeds 10 jaar by Welbeplanplase en werk veral met die boerdery se 1680 volstruise.
Op ‘n vraag wat sy toekomsplanne is, het hy gesê hy wil nog lank by Welbeplan bly, want hy sou graag ‘n voorman wil word.
Joseph het prysgeld en verkoopbewyse ter waarde van R10 000 gewen.
Helen Butler van Agri Klein-Karoo het Joseph en Truter namens dié landbouvereniging geluk gewens met die prestasie. “Ons is verskriklik trots op Marius. Baie geluk Marius, asook aan jou bestuurder, Hentie Truter. Welgedaan!” Sy het ook ‘n uitnodiging aan alle boere gerig om hulle landbouwerkers vir volgende jaar se Prestige Landbouwerker van die jaarkompetisie in te skryf. Inligting oor volgende jaar se kompetisie sal vroeg in volgende jaar beskikbaar wees.