Strenger waterbeperkings
Die sowat 4 mm reën wat Maandagaand en -nag in Prins Albert geval het, het weinig aan die dorp se waterkrisis verander en kon nie keer dat nóg strenger waterbesparingsmaatreëls ingestel word nie. Huishoudings word reeds tot 90 liter water per persoon per dag beperk en met sowat 70 gastehuise word ’n skerp toename in besoekers in Desember verwag. Die munisipale bestuurder, Anneleen Vorster, het verlede week met senior bestuurders en wykskomiteelede vergader. Die onderburgemeester, Linda Jaquet, het in ‘n WhatsApp-boodskap aan inwoners van wyk 2 gesê: “Die waterverbruik in die dorp is te hoog. Ons oorskry ons beskikbare waterbeskikbaarheid met 144 000 liter per dag. Daarom word almal nou daaraan herinner dat munisipale waterverbruikers by 90 liter per persoon per dag moet bly.” Die invloei van water – van agt boorgate, plus leiwater – na reservoirs is sowat 1 223 miljoen liter per dag. In toerisme maande (veral Desember) neem die verbruik toe tot sowat 2 miljoen liter per dag, volgens provinsiale statistiek. Sedert verlede Donderdagnag is bykomende maatreëls ingestel.
Waterdruk word nou tussen 23:00 en 05:00 verminder en inwoners moet doodseker maak dat daar geen lekkasies op hul erf is nie. Alle krane moet styf toegedraai word en die watermeter dan nagegaan word om te kyk of water iewers lek. Inwoners mag glad nie meer ’n tuinslang gebruik om hul tuine nat te maak of karre te was nie. Hulle moet seker maak dat alle swembaddens bedek is – ’n maatreël wat reeds verlede jaar ingestel is, maar nou streng afgedwing gaan word. Indien inwoners nie boorgatwater of leiwater gebruik nie, moet hulle die munisipale bestuurder se toestemming kry om hul swembadwater aan te vul. Inwoners kla egter dat die munisipale swembad, wat twee jaar gelede ingewy is, nog geen bedekking het nie en dat daar daagliks duisende liter water verdamp. Munisipale wetstoepassingsbeamptes patrolleer sedert verlede Vrydag die strate en kan huishoudings onaangekondig besoek. Inwoners kan op die plek met R200 per oortreding beboet word indien hulle nie die toepaslike munisipale maatreëls nakom nie.
Voorts sal die munisipaliteit geen keuse hê nie as om wasters te installeer wat waterverbruik beperk op die pype van groot waterverbruikers wat voortgaan om die waterbeperkings te ignoreer nie. Jaquet het die Kweekvalleiwaterverbruikersvereniging bedank wat van hul waterbeurte aan die munisipaliteit afgestaan het om die situasie te stabiliseer. “En dankie aan almal wat alles in hul vermoë doen om water te bespaar.”
Die gemiddelde reënvalsyfer in Prins Albert die afgelope ses jaar toon ’n drastiese afname. Waar dit in 2012 oor die 300 mm was, was dit in 2015 net minder as 200 mm en in 2018 net oor die 100 mm.
Hugh Forsyth, voorheen voorsitter van die belastingbetalersvereniging hier, sê sy meting toon daar het tot dusver vanjaar in Prins Albert nog net 48 mm reën geval.
Merweville boorgate raak droog
In ‘n persverklaring deur die munisipaliteit van Merweville is inwoners ook hierdie week ingelig dat drie van die dorp se ses boorgate reeds droog is. Inwoners word gewaarsku dat die huidige waterverbruik hoër is as wat die munisipaliteit kan voorsien. “Die munisipaliteit is tans besig met die toevoeging van boorgate wat volgende week sal plaasvind. Daar word tans ondersoek in die area gedoen vir die boor van nuwe gate vir addisionele water,” lui ‘n deel van die verklaring.
Die Beaufort-Wes-munisipaliteit het Woensdagoggend water in vyfliter-houers na Merweville aangery om ‘n noodkamer te stig. Die munisipaliteit het die WesKaapse departement van rampbestuur gekontak en hulp gevra vir water vir Merweville en Gift of the Givers is ook gekontak om hulp te verleen.