Die son skyn vir Kannaland
’n Belegging van R1,2 miljard kan groot omwenteling in Kannaland en veral vir Calitzdorp, teweegbring. Kannaland se munisipale bestuurder, Reynold Stevens, het bevestig dat die finansiering beskikbaar is vir die aanlê van ’n sonplaas net buite Calitzdorp waar sonenergie met uiters gevorderde tegnologie opgewek gaan word. Behalwe dat die projek energie gaan opwek beloof dit ook om werksgeleenthede aan inwoners te verskaf.
“Hierdie loodsprojek deur die Inovasure-maatskappy is reeds in ’n gevorderde stadium en gaan Kannaland in ’n ander dimensie plaas. Dit behels onder andere water, elektrisiteit en sekuriteit, asook ’n geografiese inligtingstelsel,” het Stevens hierdie week gesê.
Die projek word deur 39 ingenieurs en wetenskaplikes bestuur en is enig in sy soort. Volgens Stevens gaan dienste soos waterverbruik, riolering en elektrisiteit verbeter word. ”Dit gaan basiese dienste na die mense bring en gaan ook aangewend word om water te herwin. Dit sal gebeur dat rioolwater nog voordat dit nog by die rioolwerke uitkom, weer hersirkuleer word wat die druk op die rioolnetwerk beslis gaan verlig. Gryswater sal dan gebruik word vir tuine en terreine en sal aan skole en ander instansies verskaf word. Dit sal ook die waternood verlig.”
Magdalena Barry, burgemeester van Kannaland, voorsien dat effektiewer dienste geskep gaan word aangesien die dorp sy eie energie kan opwek en goedkoper aan inwoners voorsien word. Volgens Wayne Robertson, bestuurder van gemeenskapsdienste, is die stelsel so gevorderd dat dit ook internetdienste aan inwoners kan verskaf.