# sterkersaam#lekkerdersaam
Kort nadat die Springbokke die derde keer as wêreldkampioene die Web Ellis-trofee omhoog gehou het, berig Die Burger dat ná die aankondiging van die Springbokspan vir die Wêreldbeker-rugbytoernooi in Japan, die versugting uitgespreek is dat hul vertoning die vonk sal wees wat die droom van nasiebou weer in ons land sal laat vlam vat. En dan berig Die Burger verder: Sonder om onrealisties te wees oor hoe ver die krag van sport strek, het tonele landwyd ná die span se sege in die eindstryd, hul verwelkoming op die OR Tambo-lughawe, en die span se landwye segetoer om dankie te sê aan al hulle ondersteuners, bevestig dat 'n nuwe samehorigheidsgevoel inderdaad onder SuidAfrikaners vaardig is.
Dit was veral verblydend om op TV en sosiale media te sien hoe 'n jong geslag Suid-Afrikaners hulle in hulle diversiteit – en met uitbundige vreugde – agter die Bokke verenig.
Vir 'n paar oomblikke is al die dinge wat ons verdeel, vergete. Vir 'n paar oomblikke skuif ons allerhande onbenullighede op die agtergrond, en vier ons saam fees. So hier en daar was daar 'n sot wat op sosiale media die geleentheid wou gebruik om politieke of populistiese munt uit die gebeure te slaan, maar daardie stemmetjies is deur die harmoniese en oorverdowende koor van vreugdeliedere verswelg. Hand om die nek met mekaar, en al vlagswaaiende, het SuidAfrikaners van alle rasse en stande die groot oomblik gevier. Vir 'n oomblik beleef ons in die land wat 'n gediversifiseerde Springbokspan op die veld ervaar het – saam is ons sterker!
Dít is die ware Suid-Afrika – 'n land met oorwegend goeie mense wat ten diepste begeer om skouer aan skouer en in harmonie met mekaar saam te leef. Ten diepste wil die meeste van ons 'n rustige lewe leef en in vrede opstaan om te gaan werk, en in vrede vanaand ons koppe op 'n kussing neersit. Ten diepste wil by verre die meeste van ons eintlik saam dans en sing en jubel – al doen ons dit op verskillende maniere. Ons is 'n land waar almal nie skelms en rassiste en vuisslaners en moordenaars en wetsoortreders is nie – al laat die koerante dit soms so lyk. Ja, natuurlik het Suid-Afrika soos alle ander lande sy moeilikheidmakers, maar gelukkig het Suid-Afrika ook sy miljoene der miljoene mense wat in goodwill teenoor almal leef. Die versoeners en vredemakers is baie meer as dié wat verdeel. Die bouers is baie meer as die brekers.
Dis wanneer ons vir mekaar die mooi stories van ons land se mense begin vertel, dat jy begin besef dat ons eintlik in 'n wonderlike land met wonderlike mense woon. Dink maar net aan al die mense wat hulle daarvoor beywer om sonder enige voordeel vir hulleself, van die land 'n beter plek probeer maak. Dink maar aan die baie persone en instansies wat hulle daarvoor beywer om dit vir ander ander meer leefbaar en lekkerder te maak. Dink maar aan die goeie gesindheid en oop beursies deur skarebefondsing vir 'n goeie saak of om mense in hulle nood by te staan.
Iemand sê net die ander dag, dat as mens na al dié mooi verhale van ons land luister, besef jy watter wonderlike plek Suid-Afrika is, en watter wonderlike mense hier woon. Máár, sê die persoon net in die volgende sin, sodra jy TV-nuus kyk of na 'n politieke leier luister, wil jy jou tasse pak om te emigreer.
Miskien moet ons maar net ons oë vir die nuus toedruk en ons ore vir die politici. Miskien moet ons maar net meer mekaar raaksien, al die goeie en goedgesinde mense om ons. Miskien moet ons maar net by mekaar inhaak en saam werk en sing en bid en lag.
Want #sterkersaam #lekkerdersaam in hierdie wêreldkampioenland van ons!