Dis vrugtetyd in die Klein-Karoo
Daar is ‘n hele aantal dinge wat besoekers gereeld na die Klein-Karoo lok, en een van die aspekte is die geleentheid om self vrugte te pluk. Met die somer wat in al sy warmte aangebreek het, begin appelkose en perskebome gereed maak om hulle vrugte met mense te deel. Die eerste appelkose kan reeds vanaf 23 November tot ongeveer 8 Desember by De Krans in Calitzdorp gepluk word.
Die Klein-Karoo is bekend vir sy Bulidaappelkose en ten spyte van die droogte is daar ’n oes om te geniet. Die appelkose sal skaars van die takke wees dan is dit persketyd en Oom Sarel-taaipitperskes kan dan vanaf 14 tot 29 Desember by De Krans gepluk word.
Vroeg in die nuwe jaar sal wynkelders se wingerde ook vir ‘n rukkie vir die publiek oop wees om hanepoot te gaan pluk.
Calitzdorp is ‘n gewilde besoekpunt waar van die land se beste wyn en port ook by verskeie kelders geproe kan word tussen die vrugteplukkery by De Krans.
De Krans was ook een van Calitzdorp se kelders wat op 8 November ‘n Platter-vyfstergradering vir sy Cape Vintage Reserve 2017 portwyn ontvang het. Die graderings was toegeken vir die Platterwyngids van 2020. Die platter-wyngids deur Diners club is ‘n internasionaal-erkende wyngids.
Om seker te maak daar jy kry ‘n plukplek en dalk ook ‘n sitplek vir uitspan, is dit raadsaam om vooraf te laat weet van ‘n besoek. Vir meer inligting skakel 044 213 3314. Vir meer inligting oor besienswaardighede in en rondom Calitzdorp kontak Calitzdorp-toerisme by 044 213 3775