Karelse opgeneem in wêreldbeker-oefengroep
Die 18-jarige Tyrese Karelse wat onlangs in die senior SWDkrieketspan opgeneem is, staan ‘n groot kans om vir die nasionale o.19-krieketspan gekies te word. Die span neem volgende jaar in Januarie aan die o.19-krieketwêreldbekertoernooi deel wat deur Suid-Afrika aangebied word. Dié hotkloukolwer is tans ingesluit in die o.19-krieketwêreldbekeroefengroep wat vanaf 28 November tot 10 Desember ‘n oefenkamp in Pretoria gaan bywoon.
Benewens die prestasie, is hy ook vir die o.19 Coca-Cola Khaya Majola-span gekies. Na afloop van hierdie oefenkamp en die o.19 Coca- Cola Khaya Majola-krieketweek sal die keurders ‘n finale twintigtal aanwys wat Suid-Afrika aanstaande jaar by die wêreldbeker gaan verteenwoordig.
Die toekoms is voorwaar blink vir Karelse as ‘n mens in ag neem dat huishoudelike krieketname soos Kagiso Rabada en Aiden Markram wat tans in die senior Protea-span speel, ook in 2014 vir die nasionale o.19-krieketspan gespeel het.
Karelse het sy debuut op 31 Oktober teen KwaZulu-Natal in Durban gemaak waarna hy 52 lopies gemoker het. In sy volgende wedstryde vir dié franchise het hy dit opgevolg met relatiewe goeie beurte van 24 en 16 lopies teen die Vrystaat.
Die afgelope naweek het hy opnuut sy bestendigheid bewys toe hy teen Gauteng op die Oudtshoornsportterrein ‘n vloeiende 38 en 4 lopies aangeteken het. Volgens Karelse speel hy sedert die begin van sy hoërskoolloopbaan al vir die plaaslike krieketklub, Union Stars, en beskou hy groot krieketgeeste van dié klub soos Johan Bruiners en Alrich Booysen as sy rolmodelle.
Op internasionale vlak is dit Virat Kholi (kaptein en toporde-kolwer van die Indiesekrieketspan) se kolftegniek vir wie hy die grootste bewondering het, sê hy.