Hopeville kry basiese dienste
Die nuwe informele nedersetting, Hopeville, wat verlede jaar langs die N12 deur die Backyard Dwellers of Hope gestig is, het verlede week toiletgeriewe en water van die Oudtshoorn-munisipaliteit ontvang en inwoners het sedert vorige beriggewing meer as verdubbel.
Volgens Zyna Mduma, voorsitter van die Backyard Dwellers, is daar tans 46 opslaanhutte in Hopeville. Dit nadat sy aanvanklik in November teenoor die media gesê het hulle is slegs ‘n klein groepie wat vir bewusmaking van hulle nood daar gaan plak en dat sy nie gaan toelaat dat die nedersetting uitbrei nie. Daar was met vorige beriggewing ongeveer 18 strukture waarvan ‘n hele aantal onbewoon was.
Die nedersetting is in November verlede jaar gestig na ‘n groep inwoners wat in agterplase woon ongeduldig geraak het met die munisipaliteit se leë beloftes oor behuising vir agterplaasbewoners.
Sedert November verlede jaar het die bestuur van die gholfbaan, sowel as die munisipaliteit probeer om uitsettingsbevele deur die hof te bekom, maar die Backyard Dwellers het na hul arrestasie vroeër in November, ‘n interdik teen die munisipaliteit bekom wat die munisipaliteit verhoed om hulle van die grond af te sit. Die grond waarop die nedersetting gevestig is grens aan die gholfbaan en behoort aan die munisipaliteit.
Mduma hou egter vol dat die nedersetting steeds ‘n tydelike situasie is.
“Amptenare van die munisipaliteit is reeds met ‘n opname besig. Ons het Maandag met hulle vergader en dit lyk of die besprekings vir ‘n tussenkamp waar ons kan woon tot ons huise kry, goed op dreef is,” het sy gesê.
Volgens haar sal die groep skuif as die tussenkamp vir hulle opgerig word.
Intussen raak inwoners van Vyfdelaan, langs die N12, ongeduldig met die nedersetting wat aanhou uitbrei.
Volgens ‘n inwoner wat anoniem wil bly om konfrontasie met die Hopevillers te vermy, ruk die situasie hand uit.
“Aan die begin het ons die situasie verstaan en simpatie met die mense gehad en ons het hulle kans gegee om hul punt te maak. Nou groei die nedersetting en die munisipaliteit verskaf dienste aan hulle en dit is onbillik teenoor ons wat hard gewerk het om ons huise netjies en in stand te hou.”
Volgens die inwoner is daar gereeld taxi’s wat op die oop stuk grond oorkant hulle huise parkeer en harde musiek speel en is dit ook onooglik en bring dit die waarde van hul huise af.
“Ons verstaan die munisipaliteit moet die basiese dienste aan almal in die dorp verskaf, maar wat van ons mense wat al jare in ons eie huise daar woon en betaal om daar te woon?”
Ntobeko Mangqwengqwe, woordvoerder van die Oudtshoorn-munisipaliteit het die week bevestig dat ‘n uitsettingsbevel wat hulle probeer bekom het onsuksesvol was, maar vrae oor of die Hopevillers amptelike toestemming van die munisipaliteit het om daar te woon het onbeantwoord gebly.