Prins Albert skool wil messteker skors
Die Hoërskool Zwartberg in Prins Albert het nie plek vir messtekers en gewelddadige leerders nie.
So het die beheerliggaam van die skool verlede Donderdag op ’n vergadering besluit ná ’n voorval twee weke gelede waarin ’n 18-jarige graad 9-leerder ’n 17-jarige skoolmaat, in graad 11, met ’n mes toegetakel het. “Die beheerliggaam het beslis die aanvaller is geskors, tot dié aanbeveling tot uitsetting deur die Wes-Kaapse onderwysdepartement (WKOD) goedgekeur en die leerder permanent verwyder is,” het die skoolhoof, Ricky McKnight, by navraag gesê.
Bronagh Hammond, WKODwoordvoerder, het Woensdagmiddag egter gesê nog geen aanbeveling is van die beheerliggaam ontvang nie.
Dit volg nadat die slagoffer 14 dae gelede gedurende pouse vyf keer met die mes gesteek is – op sy rug, naby sy niere, en ook teen sy arms en op sy hande toe hy hom teen die aanvaller probeer verdedig het. Dit het ten aanskoue van talle ander leerders gebeur.
Die geskokte slagoffer het aan Oudtshoorn Courant gesê hy kan steeds nie glo wat tydens eerste pouse, ten aanskoue van skoolmaats, gebeur het nie. “Ek het dit nie gesoek nie. Ek het geloop en praat en per ongeluk teen hom vasgeloop. Toe pluk hy sommer ‘n mes uit.”
Dié koshuisleerder van Leeu-Gamka is intussen uit die hospitaal ontslaan en terug skool toe. Hy voel verlig dat die vermeende oortreder nie meer op die skoolterrein toegelaat word nie. “Ek het gehoor hy is geskors.”
Dis nog onduidelik hoe die oortreder die mes tot op die skoolterrein ingesmokkel het, omdat die skool – saam met die Prins Albertse polisie – leerders se tasse sowel as die leerders self gereeld, sonder waarskuwing vooraf, vir wapens en dwelms deursoek.
Die vermeende messteker is net ná die voorval in hegtenis geneem, maar ná assessering deur die polisie in die sorg van sy ouers vrygelaat. Hy het verlede Woensdag in die plaaslike landdroshof verskyn. Sy volgende verskyning is op 4 Maart, het die staatsaanklaer, Marvon de Vos, by navraag gesê.
Inwoners van die woonbuurt Noordeinde in Prins Albert het intussen vergader om beswaar te maak teen dié seun se aggressiewe gedrag en op sy skorsing uit die skool aangedring. Leerders het ook op die skool se Facebook-blad geëis dat hy nie weer op die skoolterrein toegelaat word nie.