Moordenaar uiteindelik na vier jaar gevonnis
Siphamandla Claassen (29) van Smartie Town op Oudtshoorn, wat van moord en verkragting van sy meisie skuldig bevind is, is Maandag in die streekhof 30 jaar tronkstraf opgelê.
Claassen het die aand van 8 Oktober 2016 vir Juliana Lingerveldt met ‘n klip teen die kop gekap, haar ontklee en verkrag.
Haar naakte liggaam is die volgende oggend deur ‘n verbyganger naby die volstruisslagpale opgemerk.
Twee jong mans, wat die betrokke aand saam met Claassen en Lingerveldt gekuier het, het getuig dat hulle gesien het hoedat Classen die vrou aanrand en verkrag.
Hy het in ‘n pleitverduideliking erken dat hy Lingerveldt een keer met ‘n klip teen die kop gekap het, maar nie bedoel het om haar dood te maak nie. Hy het ook ontken dat hy haar verkrag het.
Die staatsaanklaer, Corné Pretorius, het die hof vir lewenslange gevangenisstraf gevra vir een van die wreedste moorde en verkragtings in die Oudtshoorn-distrik waarvan hy weet. Volgens hom het Claassen ‘n weerlose vrou wreed vermoor en verkrag. Hulle het ‘n tyd saam gewoon en sy het hom vertrou.
Claassen se regsverteenwoordiger, Eugene Roos, het die hof versoek om sy ouderdom en tydperk van aanhouding vir vonnisoplegging in ag te neem.
Streeklanddros Neels Nortjé het Claassen se weergawe van wat met die oorledene gebeur het verwerp en gesê dat hy aan twee ernstige misdrywe skuldig bevind is. Hy het ook geen berou getoon nie.
Claassen is 20 jaar vir moord en 10 jaar vir verkragting opgelê met drie jaar van die vonnis vir verkragting wat samelopend met die 20 jaar uitgedien kan word vir ‘n effektiewe vonnis van 27 jaar. Hy is ook onbevoeg verklaar om ‘n vuurwapen te besit.