Oudtshoorn-munisipaliteit gee antwoorde oor gedenksteen
Bykans ‘n maand na die gedenksteen wat in Baron van Reedestraat deur die Oudtshoornmunisipaliteit geskuif en in die proses beskadig is, het die munisipaliteit Woensdagmiddag laat aangedui dat die wiele oor die herstel van die steen aan die rol is.
Die gedenksteen is 30 jaar gelede op die middelmannetjie in Baron van Reedestraat deur die munisipaliteit en bewaringskomitee opgerig toe daar besluit is om die straat te verbreed.
Die Oudtshoorn Courant het in Januarie berig dat die steen effe geskuif het na ‘n swaarvoertuig dit vermoedelik gestamp het. Die munisipaliteit het daarna besluit om dit na ‘n veiliger plek te skuif.
‘n Gedeelte van die gedenksteen het losgekom en afgebreek toe munisipale werkers die steen met kettings opgehys het.
Volgens Hazel Jonker van Heritage Oudtshoorn Erfenis het die permitkomitee reeds ‘n vergadering gehou waarvan die munisipaliteit deel was.
“Ons het aanbeveel dat die steen in die museum se tuin opgerig word. Dit is nou in die munisipaliteit se hande. Dit is egter kommerwekkend dat die stukke wat afgebreek het, steeds op die middelmannetjie lê. Daar is ‘n gevaar dat dit beskadig kan word en is ook ‘n gevaarrisko vir inwoners wat op die middelmannetjie loop.”
Ntobeko Mangqwengqwe, woordvoerder van die Oudtshoornmunisipaliteit, het Woensdag in ‘n verklaring gesê dat daar gesprekke is oor die heroprig van die gedenksteen by die museum en dat die steen tans veilig by die Oudtshoorn-brandweer staan waar dit sal bly tot daar besluite oor die heroprig en herstel gemaak is.
Volgens hom het deskundiges in klipwerk ook aangedui dat hulle bereid is om te help met die herstel van die steen.