Union Stars klop Harlequins
Union Stars se A-span het Saterdag by die Bridgton-sportgronde vir Harlequinsmagte in 'n SWD Premierliga wedstryd met 6 paaltjies afgeransel. Harlequins het die loot gewen en besluit om eerste te kolf waarna hulle slegs 82 lopies in die 36ste boulbeurt almal uit kon aanteken. Vir die weermagspan kon slegs Tshepo Kekane met sy 24 lopies 'n noemenswaardige bydrae maak.
Dillon Nuys (4/20) en Reagon Rhode (3/9) het die beste met die bal vir Stars gevaar. Veral Rhode se boulsyfers is uitsonderlik as 'n mens in ag neem dat hy slegs 9 lopies afgestaan het in die 10 boulbeurte wat hy afgestuur het waarvan vyf boonop leeg was.
Union Stars het die tellings in hul kolfbeurt in die 20ste boulbeurt verbygesteek met vir die verlies van vier paaltjies.. Nuys (30*) en Pieter Stuurman (24) was die uitblinkers met die kolf. Nuys was ook met sy veelsydige vertoning welverdiend as man van die wedstryd aangewys.
Union Stars wen dus met 6 paaltjies. Dié span het ook die volgende dag (Sondag) met Ramblers klaargespeel en hulle met 50 lopies geklop. Union Stars het 175 lopies almal op die telbord geplaas. Vir die tuispan het Everino Swartz 51 lopies aangeteken. Rhode (3/22) en Nuys (2/11) se akkurate boulwerk het wéér 'n groot rol gespeel om Ramblers tot 'n eindtelling van 125 lopies te beperk.
Met hierdie oorwinnings het Union Stars sy voorsprong op die algehele punteleer na 54 punte gerek. George-krieketspan is in die tweede plek met 41 punte. Stars se laaste ligawedstryd is Saterdag (more) om 10:00 op die Bridgton-sportterrein teen Ramblers. Leroi Bredenkamp, kaptein van Union Stars, het sy spelers aangemoedig om hul wen-momentum te behou sodat sy span die uitspeelwedsryde wat daarna volg met selfvertroue kan aanpak.