Nóú is die tyd vir boeke
Skielik, in dié inperkingstyd, is apokaliptiese leesstof in aanvraag: Boeke oor isolasie, eindtye en peste en plae wat die mensdom bedreig.
Jy soek verniet na Dean Koontz se Eyes of Darkness of Sylvia Browne se End of Days. Dis oral
(op internet) uitverkoop, nuut en tweedehands. Jy stof dus jou Die plaag deur Albert Camus of Die muur van die pes deur André P. Brink af. Deon Meyer se Koors (Fever) lyk nie meer so vergesog en surrealisties nie, ook nie Horrelpoot (Trencherman) deur Eben Venter nie. Op Facebook moedig leesgroeplede mekaar aan om weer Giovanni Boccaccio se The Decameron oor die Middeleeuse Swart Dood nader te trek. Nostradamus se voorspellings word uitgepluis – so ook boeke oor Siener van Rensburg en Johanna Brandt se visioene.
Boekwinkels is toe, posbesteldienste staan stil en tydskrifte mag nie verkoop word nie. Daar is twee opsies: Jy fynkam jou eie boekrak of koop e-boeke, laasgenoemde ’n verskynsel waaraan die meeste boekliefhebbers nooit juis vatplek gekry het nie. Die skrywer Alta Cloete, roep op Facebook uit: “Red ’n skrywer – koop ’n e-boek! Ons papierboeke lê ingeperk in pakstore en boekwinkels.”
Die spanningsromanskrywer Chris Karsten wat in George woon, sê lees is in elk geval ’n ding wat hy daagliks doen, “maar dis asof ek alle boeke in dié inperkingstyd met groter aandag lees. Leer die potensiële blootstelling aan ‘n virus my om elke woord, sin en paragraaf met groter toewyding te beproef en waardeer? Boeklesers voel nooit afgesonder nie. Hulle ontmoet interessante mense en wonderlike plekke, word ingetrek in diep intriges. Almal wat ingehok voel, behoort dié kans te gebruik om hul verbeelding vrye teuels te gee tussen die bladsye van lekker boek.”
Die digter en vertaler Daniël Hugo van Prins Albert sê dit val hom op hoe dikwels mense nou op sosiale media oor hul goeie leesgewoontes praat. “Dis ’n ontvlugting uit jou isolasie. Mense daag mekaar uit om te sê wát en hoeveel hulle lees. Hulle soek aanbevelings by mekaar. Skielik beleef die e-boek ’n oplewing omdat niemand toegang tot boekwinkels en biblioteke het nie. Mense lees graag die sogenaamde apokaliptiese boeke, maar ook ikoniese boeke wat hulle jare laas gelees het – Henno Martin se Vlug in die Namib of die uitdagende romans van Etienne Leroux.” Lapa/Penguin RandomHouse het ’n sakegeleentheid in dié pandemietyd gesien en pas die publikasie van vyf nuwe e-boeke aangekondig. Twee van hulle is Virus-proof Your Small Business: 50 ways to survive the Covid-19 crisis deur Douglas Kruger; en Afterland deur Lauren Beukes (fiksie oor ’n wêreld waarin 99,9% mans in ’n pandemie sterf).
Moenie dink boekbekendstellings is iets van die verlede nie: Afterland, byvoorbeeld, word vandeesweek virtueel bekendgestel – nóg ’n nuwigheid om boeke en lees lewendig te hou. Jy kan al dié geleenthede gratis bywoon.
Die skrywer van die spanningsroman Zola, Johan Jack Smith, vertel daar is so dertig digbundels in sy badkamer, “die ideale tyd vir lees!” Hy en sy vrou het ’n roetine gevestig om saans voor slaaptyd vir hul peuter te lees. “Sy woordeskat het aansienlik verbeter. Maar ek is besig met my meestersgraad; dus word al my tyd nou hieraan bestee. “Boeke is ’n uitlaatklep uit die werklikheid – en is soveel méér nou nodig. Baie mense is vasgevang in ’n gedwonge roetine. Wat is deesdae beter as om te ontsnap na die wonderwêreld van boeke?”