Lag ‘n slag

Kyk, inperking is nie vir sissies nie. In tye soos dié, wanneer die huiswerk nie wil ophou nie, te veel mense gelyktydig op die netwerk is, en tannies op WhatsApp jou bombardeer met samesweringsteorieë oor Covid-19, is dit belangrik om ’n sin vir humor te hê.

Vra net vir kunstenaar Kobus Galloway, wat met sy pittige illustrasies Idees Vol Vrees gereeld Suid-Afrikaners aan die lag het. Hierdie illustrasies beeld gewoonlik woordspeling uit, met gunstelinge soos moerkoffie (twee bekers wat, wel...), "Custard" Semenya, en "Peer" Spies. Verlede week was dit GraaffReinet se beurt om te lag, toe Galloway hierdie Karoodorp in sy dorp-reeks illustreer met ’n, jy’t reg geraai, graaf wat net ry. "Graaff-Reinet was net so lekker woord om mee te speel," deel te kunstenaar, wat ook dorpe soos Gansbaai en Brakpan so verteenwoordig het. Galloway motiveer lesers om kreatief tydens inperking te bly, al is dit soms moeilik om gemotiveerd te bly. "Hoe meer ’n mens iets doen, hoe beter sal jy raak. Ek wil self weer bietjie die kwaste afstof en weer begin verf. Wie weet? Dalk verf ek iets in of rondom Graaff-Reinet." Wanneer Galloway nie illustreer nie, werk hy aan sy agtste boek, Daar’s ’n Warmbrak in my Woefkardoes, wat handel oor Afrikaans en woordspeling. "Daarin sal ek kinders, sowel as die ouer geslag, meer leer oor ons mooi taal."

Hy het ook onlangs geskryf aan ’n TV-reeks vir ’n Afrikaanse kanaal, maar kan nie te veel hieroor verklap nie.

Lesers kan meer van Galloway se illustrasies sien op sosiale media platfroms by @ ideevolvrees.